Жырла, гюлле да ‒ тиширыулагъа

«Единая Россия»  политика партияны жамауат штабында  Тиширыуланы халкъла аралы кюнюн концерт бла белгилегендиле. Аны  «Патриот»  регион жамауат биригиу къурагъанды. 

Байрамгъа  КъМР-ни маданиятыны сыйлы ишчиси,  «Патриот» биригиуню правленине кирген  Эльдар Дымов  тири къатышханды. Ол  тиширыуланы  ала сюйген тюрлю-тюрлю композициялары бла  къууандыргъанды. Хар сахнагъа чыкъгъаны сайын тиширыуланы да кёллери кётюрюле, артистге толкъун къарсларын  аямагъандыла.   Нек дегенде  ол жырлары бла бир кесекге окъуна да къонакъланы  хар кюннгю  къайгъыларын унутдургъанды.

«Жашаугъа эмда жамауат ишлеге кюн сайын  кеслерини уллу къыйынларын салгъан тиширыулагъа байрам къураргъа къолубуздан келгенине бек къууанабыз. Быллай тюбешиуле бизге  халкъла аралы байрамны белгилеу бла чекленип къалмай, адамланы да бирикдирирге  себеплик этедиле»,- деп чертгенди  «Единая Россия» партияны  жамауат штабыны башчысыны орунбасары Оксана Суйдимова.