Жолланы жангыртырыкъдыла

Шимал Кавказда юч регионда, ол санда Къабарты-Малкъарда да, 60 километр чакълы федерал жоллагъа чайыр жаяргъа умут болгъанын билдиргендиле «Кавказ» управлениядан. Бу ишни эки кезиуге бёлгендиле: 27 километрин быйыл тамам этерикдиле, къалгъан кесегин а келир жылда жангыртырыкъдыла.

Чайыр (битум эмульсия) асфальтны юсюне жайылса, аны ичине сууну ётдюрмезге себеплик этеди. Дагъыда жол жарылмай иги кесек заманны сакъланады. Бу технологияны аты «Сларри-Сил» деп алайды.

Ишни асламысы (24 километр) бизни республикада бардырыллыкъды: Прохладный – Басхан – Элбрус трассаны эки участкасын келир жылны ахырына дери жангыртыргъа дейдиле. Чайырны къуру кесинлей угъай, ууакъ юзмез бла къатышдырып алай жаярыкъдыла.

Ставрополь крайда «Кавказ» трассаны бир кесегинде эски асфальтны къырып кетерликдиле, аны орунуна зыгъыр бла чайыр къатыш жаярыкъдыла. Дагъыстанда да бу жаны бла мадар этилликди.

Сагъынылгъан жолланы барында да кёп автомашина жюрюйдю. Бир-бир заманлада аланы саны 25 мингден окъуна атлайды. Бу ишлени бардыргъан кезиуде уа тийишли участкалада жол белгилени (ызланы) да жангыртырыкъдыла.