Бойсунмагъанлагъа - тазир

Газ ючюн жангы тазир –ма быллай сёзле бла инсанланы интернетде къоркъутадыла. Бу жаны бла къаллай тюрлениуле болгъанларыны юсюнден газ службада айтхандыла.  

Газ оборудованияны халына жыл сайын къарау эки минг жыйырма ючюнчю жыл тауусулгъан келишимге кёре толтурулады, аны ючюн хайырланыучулагъа айтырча тюрлениуле болмагъандыла. Шахарда газпромну юйлени газ бла жалчытыу бёлюмюню башчысы Артур Урусмамбетов ангылатханнга кёре, аланы хайырланыучула бла техника болумну тинтирча келишимле тауусургъа эркинликлери барды. Законнга тийишлиликде кёп фатарлы эм энчи юйлени иелери бла алгъадан тохташдырылгъан келишимле кючлерин тас этгендиле, энди хар абонент жангы жорукълагъа кёре жангы келишимле тауусургъа керекди. Специалистле чертгенлерича, газ оборудованиягъа жыл сайын къаратыу аны ишлеуюнде бузукълукъланы ачыкъларгъа, ол кёп заманны жарап турурча этерге болушады. Аланы хайырланыуну болжалы тауусулгъандан сора, ол а онтёрт жылгъа дери жетеди, былай тинтиу аны андан сора хайырланыргъа жарагъанын бла къалгъанын ачыкъларыкъды. Керек болса, аланы жангылагъа алышындырыргъа эсгертиуле этиледиле. Службаны келечилери оборудованияны хар жерин тинтип, аны юсюнден къагъыт берликдиле. Аны халы аман эсе, ала фатаргъа неда юйге газны келиуюн тыяргъа боллукъдула.

Жорукъланы бузгъанлагъа, сёз ючюн, службаны келечисин юйлерине жиберирге унамагъанлагъа тазир салынырыкъды. Алагъа алгъа эки билдириу жиберилликди, бой салмасала, аны юсюнден тарифле эм жашау журтла жаны бла комитетге билдирилликди.