Бизнесге- аслам кредит

Къабарты-Малкъарда бизнес бла кюрешгенлени кредит портфельлеринде былтыр 38,7 миллиард сом жыйылгъанды. Ол жылны ичинде аны ёлчеми алты процент къошханды, алай буруннгу жыл бла тенглешдиргенде уа,  эки кереге азайгъанды, дегендиле Россейни Банкыны республикада бёлюмюнде.

Гитче эмда орта предпринимательствону юсюнден айтханда, ала банклагъа къайтарлыкъ ахчаны ёлчеми 29 процентге асламыракъ болуп, 27 миллиард сомгъа жетгенди. Сагъынылгъан кредит портфельде была экилери да 71 процентин аладыла. Былтыр жайны орта кезиулеринден башлап, кредит бериу да азайып тебирегенди; ол Россейни Банкыны ахча-кредит политикасы башха тюрлю болгъаны бла байламлыды.

«Корпоратив кредит портфельни ёсюую шошая баргъанды былтыр. Биринчи кварталда ол 15,5 процент болгъан эсе, жылны ахырына 6 процентге жетгенди. Тенглешдирип айтханда, саулай къыралда да болум андан артыкъ башха тюйюлдю. Ол алай болгъаны Россейни Банкы инфляцияны тыяргъа кюрешгени бла байламлыды. Алай гитче эмда орта бизнес а, къырал себеплик этген программаланы хайырындан, кёпден - кёп кредит алып тургъандыла», - дегенди Банкны КъМР-де бёлюмюню башчысы Аслан Калов.

Кредит портфельге къарагъанда, анда 37 процентни жарашдырыучу производствола аладыла, 39 процентин а эл мюлк жалчытады. Регионну экономикасында экинчи бёлюм эм магъаналы болгъанын эсге алсакъ, ол да сейир тюйюлдю дерге боллукъду.