Эскроу счётну хайырланыуда жангы жорукъ

Иели юй ишлегенде эскроу счётну хайырланыуда жангы жорукъ кийирилгенди. Бу айны биринчисинде кюч алгъан 186-ФЗ номерли федерал законну хайырындан къурулуш бёлюмде болум ачыкъ халгъа тюрленип башларыкъды, адамланы сейирлери уа игирек къорууланырыкъдыла, деп айтылады Россейни Банкыны билдириуюнде.

Алай бла энди инсанла (заказ этгенле), иели юйню къурулушунда эскроу счётну хайырлансала, алагъа ишлене тургъан жашау журтда фатар сатып алгъанча аллай онгла берилликдиле. Ол санда: подрядчик ахчаны аллай счётдан жаланда юй инсанны иелигине кёчюрюлгенден сора алаллыкъды. Ол ишин тап этмесе уа адамгъа ахчасы къайтарыллыкъды.

Дагъыда быллай счётну жаланда кредит жаны бла даражасы бийик болгъан банклада ачаргъа боллукъду эди. Анда ахчагъа уа (10 миллион сомгъа дери) страхование этилликди.

Юй ишлене тургъанда, аны къоюп, ахчасын кесине къайтарыргъа сюйген инсаннга энди аллай онг берилликди. Алай подрядчикге уа, ол этген къоранчланы (материаллагъа бла ишге) къайтарыргъа тюшерикди.

Энчи юйню къурулушуна учуз «Юйюр ипотеканы» алыр ючюн ахчаны эскроу счётда тутаргъа керек боллукъду. Аны себепли бу амалны къуру адамла угъай, къурулуш организацияла да жаратырла деп ышанадыла Россейни Банкында.

Жангы жорукъла бла ишлеген подряд организацияла жашау журт къурулушну бир информация системасында кеслерини, ишлерге боллукъ юйлерини проектлерин, аланы багъаларын эмда неллай бир заманнга сюериклерин, сора эскроу счёт ачыллыкъ банкланы юсюнден хар нени да жик жиги бла кёргюзтюрге борчлудула.