Багъаланы ёсюую тохташа барады

Къабарты-Малкъарда быйыл январьда инфляция тогъуз процент чакълы болгъанды. Бир жаны бла алып къарагъанда, багъала ёсюуню сатыуда аш-азыкъ асламыракъ болгъаны тыйгъанды, башха жаны бла уа товарла сатыучуланы эмда жумушла бла жалчытханланы къоранчлары кёбейгени аланы ёрге тюртюрге кюрешедиле.

«Аны аллында ай бла тенглешдиргенде, республикада инфляция хазна тюрленмегенди. Алай айтылгъаныча, сатыуда аш-азыкъ кёбюрек болгъаны себепли аланы багъаларыны ёсюую аз-маз тохташханды. Сёз ючюн, сомну сыйы кётюрюлгени эмда пошлинала кетерилгени ючюн  тыш къыралладан картоф кёп келип башлагъанды. Аны багъасы алай терк ёсмегени аны бла байламлыды», - дегенди Россейни Банкыны Къабарты-Малкъарда бёлюмюню башчысы Аслан Калов.

Аш-азыкъ рынокда этни эмда андан этилген жарты хазыр продукцияны багъалары алгъынча алай терк ёсмейдиле. Аны сылтауун малланы эмда юй къанатлыланы жайыу бла кюрешгенле производстволарын кенгертгенде кёрюрге тийишлиди. Къаймакъ бла да болум алайды: предприятиялада эмда юйюр мюлкледе аны кёбюрек чыгъарып башлагъанлары себепли багъасы тохташыракъ болгъанды. Ары дери уа ол ай сайын ёсюп бара эди.

Жумушла бла жалчытыу рынокну юсюнден айтханда, чач къыркъыучуланы эмда ариулукъ салонланы материаллагъа, арендагъа эмда иш хакълагъа этген къоранчлары ёсгени ючюн, анда багъала да терк кётюрюлюп башлагъандыла.
Башха затланы юсюнден айтханда, сёз ючюн, алтын жюзюкле учузуракъ окъуна болгъандыла. Былтыр тюкенле алыучуланы чакъырырча маркетинг акцияла бардырып тургъандыла, аны себепли ол кезиуде жюзюкле бютюнда учуз эдиле. Быйыл а алтын багъа болгъаны ючюн тюкенлени аллай онглары азыракъды.

Саулай айтханда, къыралда, бизни республикада да инфляция экономикагъа тап мардадан (4%) энтта да уллуду. Товарла чыгъарыучула эмда жумушла бла жалчытыучула сурамны ызындан жеталмайдыла, аны ючюн а багъала кётюрюлюп барадыла. Ол себепден Россейни Банкы экономикада ставкаланы уллу чекде тутады. Аны хайырындан инфляция шошайып, келир жылда тийишли мардасына жетерикди.