Кёк отлукъну юсюнден – сабийлеге

Газ бла жалчытхан компанияны келечилери кёк отлукъну къоркъуусузлу хайырланыу жорукъларыны юсюнден школлада дерсле бардыра туруучудула. Быйыл да бу ишге не замандача уллу магъана бериледи. Жыл башланнганлы бери компанияны адамлары бу жумуш бла кёп школлада болгъандыла. Ол санда Прохладный шахарны бар мектеплеринде эмда Чегемде ючюнчю номерли орта билим бериу учрежденияда бир ненча дерс бардыргъандыла; аланы барына да 1200 чакълы сабий къатышханды, деп билдиргендиле «Газпром газораспределение Нальчик» компанияны пресс-службасындан.

Бу дерслени магъанасын айтып турургъа керек болмаз. Сабий быллай затланы юсюнден гитчелигинден окъуна эшитсе, ол кезиулеринде, тамата болгъанында да тийишли жорукъланы эсде тутуп турлукъду, кесин, тёгерекдегилени да сакъларыкъды.

Алай бла специалистле школчулагъа газ бла ишлеген оборудованияны къалай хайырланыргъа тийишлисин ангылатхандыла, адам кесин къалай сакъларгъа кереклисин билдиргендиле, газ ийис сезилгенде къайры сёлеширге, не зат этерге боллугъун да туура этгендиле эмда школчуланы сорууларына жууап бергендиле. Компанияда айтханларыча, ала бу ишни мындан арысында да бардырып турургъа таукелдиле.