Таза суу бла сылтаусуз этерча

Басхан районда «Шимал-Кавказ федерал округну айнытыу» къырал программагъа кёре, бир къауум элни  таза суу бла жалчытырча  уллу   инфраструктура проект бардырылады, деп билдириледи КъМР-ни Къурулуш эмда  жашау журт- коммунал мюлк министерствосуну пресс-службасындан.

Бюгюнлюкде къурулуш ишле Заюково, Исламей эм  Атажукино элледе тамамлана турадыла. Проектге кёре, онеки суу сакъланнган жер ишленирикди, бусагъатда аладан жетиси  хазырдыла.  Дагъыда ючюсю ишлене турадыла эм къалгъан экисин да  археология бла байламлы ишле бошалгъанларындан сора башларыкъдыла.

Аны бла бирге  Басхан шахарда 2,5 километр тенгли бирде суу быргъыланы тартырча ыз къазылгъанды. Андан сора да, автомобиль жолну бузмай, быргъыланы  тюбю бла ёдюрюрча мадар этиледи. Саулай алып айтханда, бусагъатда 25,6 километрде  ыз  тартылып хазырды.  

Объект хайырланыргъа берилсе,  Атажукино, Баксан, Баксанёнок, Дугулубгей, Исламей, Псычох  эм Заюково эллени, саулай 120 минг адамны,  таза суу бла сылтаусуз этерикди. Андан сора да,  аслам энергокюч къоратхан  иги кесек скважина да керек боллукъ тюйюлдюле. 

Планнга кёре, объект келир жылны ахырындан кеч къалмай хайырланыргъа берилирге керекди.