Миллет паркны жерлеринден юлюш бёлгенди

Экономикада аманлыкълагъа къажау излеу-тинтиу жумушланы бардыргъан кезиуде, РФ-ни ФСБ-сыны КъМР-де Управлениясыны къуллукъчулары Элбрус районну «Финанслагъа башчылыкъ этиу» муниципал учреждениясыны алгъыннгы таматасы Ю.З. Мерзоевни бузукъчу ишин тохтатхандыла.

УФСБ-ны пресс-службасындан бизге билдиргенлерича, ол жалгъан документле хазырлап, аны бла байламлы болгъан биреуге «Приэльбрусье» миллет паркда жер бёлгенди.  Алай бла къыралгъа 2 миллион сом къоранч салыннганды.

Къарачай-Черкес Республиканы Карачаевск шахарыны сюдю Мерзоев Ю.З. РФ-ни УК-сыны 159-чу статьясыны 4-чю кесегине бузукълукъ этгенин тохташдырып, аны эркинлигин условно халда 5 жылгъа сыйырыргъа,  бу кезиуде ол кесин къалай жюрютгенин сынап турургъа деген оноуну чыгъаргъанды эмда тазир салгъанды. Ол кючюне киргенди.