Музейни 65-жыллыгъына – сейир кёрмючНальчикде, Суратлау искусстволаны Андрей Ткаченкону атын жюрютген музейини алтмыш беш жыллыгъына аталып, «Заманланы сыфатлары» деген кёрмюч къуралгъанды. Аны ачылыууна республиканы белгили маданият ишчилери, жамауат да жыйылгъандыла. Аланы алгъышлай, республиканы маданият министрини орунбасары Къарчаланы Аминат, эм алгъа, музейни ишчилерине ыразылыгъын билдиргенди. «Быйыл мында бардырылгъан кёрмючле барысы да музейни алтмыш беш жыллыгъына аталлыкъдыла», - дегенди ол. Экспозиция-кёрмюч бёлюмню башчысы Нина Леонтьева айтханыча, битеу бу затланы жыйышдырыу 1925 жылда башланнганды. Ол заманда Назир Катхановну тилеги бла Ленинградны бла Москваны музейлерини хазналарындан - алагъа уа къырал, энчи адамланы жыйымдыкъларындан да чыгъармала жибериле тургъандыла - Нальчикге краеведение музейге биринчи санат ишле келтирилгендиле. Алай бла жер-жерли музейни хазнасы байыкълана тургъанды. Музейни юч залында суратла, графика, скульптурала салыныпдыла, ала эки жюзден асламдыла, кеслери да кёп онжыллыкъланы ичинде жыйылгъандыла. Араларында битеу дуниягъа белгили авторланы, юлгюге Айвазовскийни, Брюлловну, Шишкинни суратлары бардыла, сюйгенле Ваннахны, Гусаченкону, Жерештиевни, Баккуевни, Алёхинни эм башхаланы юлгюлеринде республикабызда суратлау санат къалай айныгъанын кёраллыкъдыла. Чын сауутланы сюйгенле да къууанырыкъдыла, ала кёрмючледе эрттеден бери салынмагъандыла. Бу кёрмючню ала, от жагъагъа салыннган сагъатла да жасайдыла. Кёрмюч экинчи мартха дери барлыкъды.
Поделиться:
Читать также:
16.02.2025 - 07:37 →
Игилени юслеринден хапарчы
14.02.2025 - 13:41 →
Уллу, гитче да тири къатышадыла
13.02.2025 - 07:49 →
Ненча сынау сыйындырады бу къысха жашау!..
12.02.2025 - 16:08 →
Суратла, эрттегили сауутла да
12.02.2025 - 08:49 →
Художник
|