Информация «фронтда» - 30 жыл!

Росгвардияны асламлы информация органла бла байламлыкъла жаны бла бёлюмюне бу кюнледе 30 жыл толгъанды. Бу заманны ичинде право низамны сакълаучу ведомствону информация бла жалчытыугъа жууаплы къуллукъчулары, журналистле бла бирге Росгвардияны борчлары эм муратлары бла жамауатны шагъырей этедиле. Алагъа къыйын болумлада ишлерге тюшеди, ол санда энчи аскер операция бардырылгъан жерде да.

Информация бла жалчытыу бёлюм кюч ведомствону къауумунда 1995 жылда 25 январьда къуралгъанды.  Ол кюн Россейни МВД-сыны ич аскерлерини Баш управлениясыны командованиясында пресс-бюро ачылгъанды.  Анга ич аскерлени ишлерин кертилик бла кёргюзтюрге, Шимал Кавказда терроризмге къажау операцияланы тюзлюк бла жамауатха билдирирге борчла салынадыла.

1998 жылда Шимал-Кавказ аскер округда биринчи пресс-служба къуралады. 1999-2000 жыллада уа Россейни МВД-сыны Ич аскерлерини битеу округларында эмда Грозныйде энчи буйрукъла толтургъан   бригаданы къауумунда  пресс-службала ишлеп башлайдыла.

 2016 жылда Росгвардия къуралгъаны бла бирге аны къауумунда информация ара ачылады. Ол а жангы ведомствону борчларыны бла муратларыны   халкъгъа ангылатыу ишни бардыргъанды. Ол мурат бла брифингле, ведомствону оноучулары бла тюбешиуле къуралгъандыла, телевиденияда бла радиода бериуле, документли фильмле кёргюзтюлгендиле.

Информация ара кесини борчларын толтургъандан сора, Росгвардияны аскерлеринде асламлы информация органла эм граждан обществону институтлары бла байламлыкъла жаны бла департамент  къуралады. Бюгюнлюкде да бу орган халкъны гвардиячыла тамамлагъан жумушла    бла хар кюн да шагъырей этеди, ведомствону регионлада бёлюмлерини пресс-службаларыны ишлерин бирге тийишдиреди, жамауат организацияла бла байламлыкъла жюрютеди, энчи проектлени жашауда бардырады.

Бюгюнлюкде кюч ведомствону битеу регионлада управленияларында  асламлы информация органла бла ишлеген бёлюмле бардыла. Ала уа ишлеринде энчи аскер операциягъа, терроризмге къажау операциялагъа  къатышхан жигит аскерчилени юслеринден тюз хапарны халкъгъа билдириуге баш магъана бередиле. 

 СВО башланнган кюнден бери уа Росгвардияны пресс-службасы 1850 письмо хазырлагъанды, аланы мурдорунда 15,5 минг информация билдириу бла телевиденияда сюжетле басмаланнгандыла. 

 Росгвардияны пресс-службаларыны къуллукъчуларыны арасында биринчи болуп, энчи аскер операциягъа полковник   Сергей Постнов къатышханды. Ол 2022 жылда командировканы кезиуюнде жан бергенди.     «V» аскерлени къауумунда Сергей Постнов   Гостомель жанына баргъанды, Харьков областьда,  Луганск Халкъ  Республикада шахарланы бла эллени эркин этиу къазауатха къатышханды.

 Росгвардияны асламлы информация органла эм граждан обществону институтлары бла байламлыкъла жаны бла департамент ишин бийик даражада бардыргъаны ючюн кёп кере къырал саугъалагъа тийишли болгъанды. Сёзге, 2018 жылда ведомствону сайты кюч органланы арасына эм иги  официальный сайтланы конкурсунда алчы болгъанды. 2020, 2022 эм 2024 жыллада «Къырал эм жамауат» бёлюмде  «Рунетни саугъасын» къытханды.

Отуз жылны ичинде асламлы информация органла бла  байламлыкъла жаны бла бёлюм кесини атын иги бла белгили этгенди, уллу сынам  да жыйышдыргъанды.  Аны хайырындан а жамауат Россейни Миллет гвардиясыны аскерлери тамамлагъан жумушланы юслеринден билдириулени къысха заманнны ичинде алады.

Тикаланы Фатима хазырлагъанды.
Поделиться: