«Ленинградны жигитлерине - ёмюрлюк махтау!

27 январьда Россейде Аскер махтаулукъну кюню – Ленинград къуршоудан эркин этилгенли 81-жыллыгъы белгиленеди. Аны бла байламлы КъМР-ни Башчысы Казбек Коков жамауатха чакъырыу сёзюн туура этгенди. Анда былай айтылады:

«Ол Уллу Ата журт урушну тарыхында бек бушуулу эмда бек махтаулу кезиуледен бириди. Эки жыл бла жарымны ичинде Нева сууну жагъаларындагъы шахарда жашагъанла, Къызыл аскерни солдатлары да кюйсюз душман бла жанларын-къанларын аямай сермешгендиле.

Ленинградчылагъа айтып-айталмазча уллу къыйынлыкъла сынаргъа тюшгенди – ала жууукъ-ахлуларын тас этиу, ачлыкъ, тозураулукъ, сууукълукъ, башында топ-окъланы къуюлуп тургъанлары. Къызыл аскерни солдатларыны бла офицерлерини, аланы араларында уа Къабарты-Малкъардан мингле бла жашла бла къызла да болгъандыла, бир да болмангъанча уллу батырлыкъларыны бла кишиликлерини, шахарчыланы заводлада, госпитальлада кеслерин аямай жигер уруннганларыны, аланы ётгюрлюлерини бла чыдамлыкъларыны хайырындан кюйсюз блокаданы юзерге, душманны хорларгъа, аны къой, ол артха туракъларча этерге къолдан келгенди.

Ленинград къуршоугъа алынып тургъан заманны ичинде жюз мингле бла мамыр адамла, шахарны къоруулагъан жигитле да ёлгендиле. Сыйлы Жигит шахарыбызны эркинлиги ючюн жашларын бергенлеге ёмюрлюк махтау!
Биз ленинградчыланы чыдамлыкъларына бла жигитликлерине, аланы кюйсюз сынауладан намыслары, сыйлары бла чыкъгъанларына баш урабыз. Ол бушуулу кезиу россейлилени эслериндеди, Шимал ара шахарыбызны айтхылыкъ къоруулаучуларыбызны жигитликлери келир тёлюлени да эслеринде сакъларнырыкъды. Ол дагъыда бизни кёп миллетли халкъыбызны биригиулюгюню юлгюсюдю.

Ленинградны къуршоудан эркин этиуню юлгюсю бюгюнлюкде баш кётюрген фашистлеге, къыралыбызны душманларына къажау кюреш бардыргъанланы – жигитлени туудукъларын - ниет жаны бла чыныкъдырады, ала хорламай къоймазлыкъларына ийнаныулукъ береди.

Ленинградны жигитлерине -  ёмюрлюк махтау!»

Поделиться: