Жолла мардалагъа келиширча![]() Къабарты-Малкъарда "Къоркъуусуз эм тынгылы автомобиль жолла" миллет проектни чеклеринде туризм объектлеге баргъан жолла тап эм къоркъуусуз болурча аслам иш этиледи, деп билдириледи КъМР-ни Транспорт эмда жол мюлк министерствосуну пресс-службасындан. Алты жылны ичинде "Элбрус" тау лыжа курортха, Жылы-суулагъа, Бызынгыгъа, Чирик кёллеге, Чегем чучхурлагъа, Тамбуканнга баргъан трассала мардалагъа келиширча болгъандыла. Бюгюнлюкде бу жаны бла Къабарты-Малкъарда магъаналы, уллу да объектледен бирине Экинчи Чегем - Булунгу жолну санаргъа боллукъду. Аны 27 километринде тынгылы ремонт ишле бардырылгъанлы иги кесек болады. Быйыл тийишли ишле «Жашау этерча инфраструктура» жангы миллет проектге кёре тамамланыллыкъдыла. Былтыр Черек чучхурладан башлап огъартын эки машина ёталмагъан жерледе жол жети метрге кенгертилгенди. Кече жарытырча чыракълы чыпынла салыннгандыла, жаяу жюрюгенлеге тротуарла, машиналагъа майданла да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды.Бюгюнлюкде подряд организацияны келечилери Булунну-Эл-Тюбю жолну 25 километринде жолну мурдорун кючлеп, жауун суу саркъырча быргъыла, арыкъла салып, жардан таш, топуракъ оюлмазча, черек жагъаларын суу таламазча бетондан хунала къуюп кюрешедиле. Къыш кезиуде черекле таркъайгъанда кёпюрлени чигинжилерин орнатыргъа тап болады. Анга кёре Чегем бла Жылгъы суулада тийишли ишле барадыла. Эм биринчи аркъауланы тутарыкъ чигинжилени эм хунаны да салып бошагъандыла эм башха жумушланы тамамлайдыла. Миллет проектге кёре эм Регион фонддан бёлюннген ахчагъа Чегем, Кёк-Таш, Джууунгу суу, Абардан суу, Жылгъы суу, Булунгу суу черекледе эм башха жерледе да тогъуз кёпюр жангы мардалагъа келиширча боллукъдула. Саулай алып айтханда, объектлени узунлукълары 316 метрден аслам болады. Планнга кёре, Чегем ауузунда жолну толусунлай 2026 жылда бошаргъа керекдиле. Аны бла бирге Чегем бла Башил турбазалагъа баргъан жолла да мардалагъа келиширча боллукъдула. Былтыр Элбрус районда да миллет проектге кёре А-158 трассадан Нарзанла талагъа баргъан жолну 300 метрине къаралгъанды. Буруннгу жылда да «Шхелди» бла «Джантуугъан» альплагерьлеге машина сылтаусуз барырча этилгенди. Аны чеклеринде 3,3 километрде жолну жангыртхандыла. Черек районда Бабугент-Бызынгы жолгъа тынгылы ремонт этилгенди. Зольск районда «Долина Нарзанов» бла Жылы-Суулагъа баргъан Малка-Ингушли жолгъа къаралгъанды. Аны бла бирге Этокогъа эм Тамбукан кёлге баргъан жол - «Кавказ» Р-217 трасса жангыртылгъанды. Прохладна районда Алтуд-Янтарный-Комсомольский жолну 4 километри жангыртылгъанды. Нальчикде да Канукоев, Балкаров эм Шогенцуков орамлагъа тынгылы ремонт этилгенди. Арт жыллада жолланы игилендирилгенлерини хайырындан туристлени санына да танг къошула барады. Ол шарт республиканы экономикасын айнытыуда уллу къошумчулукъ этгенин, тау элледе жашагъан жерлешлерибизни эм къонакъланы да болумларын игилендиргенин да энчи белгилерчады. Эсге сала айтсакъ, былтыр Къабарты-Малкъарда 1 миллион бла 785 минг турист болгъандыла. Ол буруннгу жыл бла тенглешдиргенде 16,4 процентге кёпдю. Эльбрусда - 1 миллион бла 172, Нальчикде - 140, Черек, Чегем эм Зольск районлада да 450 минг адам солугъандыла. Санаторийледе да 50 минг адам саулукъларын кючлегендиле.
Поделиться:
Читать также:
07.02.2025 - 10:02 →
Электрокючню къоранчларын азайтырча
07.02.2025 - 09:05 →
Предпринимательлеге-ахшы себеплик
04.02.2025 - 09:55 →
Жолла мардалагъа келиширча
03.02.2025 - 13:51 →
Республикада миллион тоннадан артыкъ алма жыйылгъанды
29.01.2025 - 11:08 →
Алты мингден аслам жумушха къаралгъанды
|