Сейир адетни тарыхы

Баям, бир адет да бошдан жаратылмайды, хар бирини сейир тарыхы барды. Къууанчлада бокалланы къагъышдырыу бюгюнлюкде байрам ингирге зауукълукъ береди, алгъын а аны магъанасы башха болгъанды.

Орта ёмюрледе адамла былай сау къалыр ючюн этгендиле. Ала ичгилери бла адырланы къагъышдыргъан заманда сууларыны жартысын бирси адыргъа къуяргъа кюрешгендиле. Аны да кесини сылтауу бар эди: чагъыргъа уу къуюлгъан эсе, бокалланы ургъанда ол къонакъбайгъа да тюшерик эди. Алай этиу бла адамла ала бир бирге къоркъуу салмагъанларын, ашха-ичгиге ёлюр от къошулмагъанын кёргюзтгендиле. Дагъыда ол кезиуледе тойчула бир- бирлери адырларын алышындырыргъа боллукъ эдиле. Былай этерге унамагъанла уа,  кеслерине уллу айып келтиргендиле, биреуню ёлтюрюрге кюрешгенлеча, олсагъатлай душманнга саналгъандыла.