Предпринимательлени санына иги кесек къошулгъанды

Быйыл биринчи январьгъа чыгъарылгъан эсеплеге кёре Къабарты-Малкъарда  гитче эм орта предпринимательстволукъ бла кюрешген  22629 субъект барды. Ол санда   5850 организация бла  16779 энчи  предприниматель. Буруннгу жыл бла тенглешдиргенде,  106,3 процент ёсюм эсленеди, деп билдириледи КъМР-ни Экономиканы айнытыу министерствосуну пресс-службасындан.

Сагъынылгъан кезиуде бек гитче предприятияла -22187, гитчеле - 412 эм орталыкъ предприятияла да 30 бардыла.  Аны бла бирге бир жыл чакълы  ишлеген  энчи предпринимательле бла биригиулелени саны  5786-гъа  жетеди.   Аладан 663-сю предприятияладыла эм  5123-сю энчи предпринимательледиле. Мында да  21,4 процент къошулгъаны белгиленеди.

Кеслери алларына бир тюрлю иш бла кюрешгенлени  саны  81466 барды. Ол санда  79120-сы кеслери алларына къармашханладыла эм  2346 -сы да энчи предпринимательледиле. Буруннгу жыл бла тенглешдиргенде,   ол  14,3 процентге кёпдю . 
Саулай алып айтханда, республикада  гитче, орта эм энчи предпринимательлени саны 108141 адамгъа жетеди. 

Быйылны юсюнден айтханда,  «Тири эм конкуренциялы экономика» миллет проектге кирген  «Гитче эм орта предпринимательлеге  болушлукъ тапдырыу" программагъа кёре къыралны жанындан себеплик  этилликди.