Жангы налог паркланы игилендирирге къоратыллыкъды

 Быйыл биринчи январьдан башлап Нальчикде  солугъан  туристледен   налог алырча закон къабыл этилгенди.

- Арт заманда  Нальчикде солугъан  туристлени санына танг кесек  къошулгъанды. Аны бла байламлы шахарны инфраструктурасына   уллу ауурлукъ сынаргъа тюшеди.  Ол себепден налогла паркланы, жамауат аслам хайырланнган  тийрелени эм  башха жерлени да  игилендирирге къоратыллыкъдыла. Бизни шахаргъа ол болмагъанча ахшы себепликди, дегенди Нальчик шахар округну администрациясыны башчысы  Таймураз Ахохов.
Биринчи заманда туристле, эм азындан, 100 сом тёлерикдиле. Болсада анга жыл сайын къошула барлыкъды эм 2029 жылгъа аны ёлчеми  беш процентге жетерикди. Налог отоуну багъасына кирликди.
 

Налогдан эркин этилген къауумгъа Къабарты-Малкъар, Донецк эм Луганск халкъ  республикалада, Белгород, Курск, Херсон, Запорожье  областьлада жашагъанла, кёп сабийли юйюрле, акъыл  балыкъ болмагъанла, табийгъат эм техноген  болумдан ачыгъанла эм борчлу халда медицина страховкалары бла багъылгъанла  киредиле. 
 

Нальчик федерал даражалы  курортланы тизмесине киреди, мында балчыкъ  эм   дарман суула бла багъылырча аламат онгла къуралгъандыла.  Ол кёп жылланы ичинде сынамлыгъын кёргюзтгенди, аны ючюн бери жыл сайын  къайтып келгенле кёпдюле. Биринчи кере болгъанланы санына да къошула барады.  

 Эсге сала айтсакъ, Нальчикде   туристле жашагъан 35  объект ишлейди. Былтыр  алада 50 минг чакълы адам солургъа эм  саулукъларын да  кючлерге онг тапхандыла.