Шимал Кавказгъа сейир жолоучулукъ

Жыл сайын жангы жылны солуу кюнлеринде улоулада  жолоучулукъланы сюйгенлеге республикада «Кавказны танглары» деген фестиваль бардырылыучуду. Быйыл аны «КБР 4х4» клуб бла Орус география биригиуню  жаш тёлю арасы Курортла эм туризм министерствону себеплиги бла къурагъандыла.   

Жолоучулукъгъа Россейни он регионундан эки жюзден аслам адам къатышхандыла, аланы араларында юйюрлери бла келгенле да болгъандыла. Фестиваль къууанчлы халда «Тау шаудан» санаторийде ачылгъанды. Кюндюз къонакъла республикабызны тауларына жолоучулукълагъа атланнгандыла, ингирге уа аланы санаторийде миллетлерибизни маданиятларыны юсюнден маданият ингирле бла сакълагъандыла. Алай бла ала битеу да элли жюз километрден аслам жолну къыдыргъандыла, Бызынгыда, Осетияны тауларында, Элекан-Су ауузда болгъандыла, Нальчикни ариу жерлерин кёргендиле. Акъ-Сууну тийресинде жыйылгъанларында уа, внедорожникледе эришгендиле, миллет ашарыкъладан да татхандыла. Къонакъбайла дайым да аланы биргелерине болгъандыла, Орус география обществону Жаш тёлю арасыны башчысы Мокъаланы Тенгиз а радио амал бла Къабарты-Малкъарны айтхылыкъ жерлерини, тарыхыны юсюнден сейир шартланы айтханлай тургъанды.   Фестиваль Чегем ауузгъа бла Акътопуракъ ауушха жолоучулукъла бла бошалгъанды.

Фестивальны къурау комитетини келечиси Вячеслав Дзугулов билдиргеннге кёре, 2011 жылдан бери «Кавказны танглары» жолоучулукъ Россейни къыбыла кесегинде жайда, къышда да бардырылгъан эм уллу башламчылыкъладан бири болгъанлай келеди. «Анда уллу сынаула, теркликге эришиуле, хорлагъанла бла къытдыргъанла жокъдула. Ол Шимал Кавказны тамаша жерлерини юсюнден сейир хапарлагъа тынгылай, табийгъат эм тарых эсгертмелеге къайта, мында жашагъан миллетлени энчиликлери, ашлары, тёрелери бла шагъырейлене ётген зауукълу жолоучулукъду, абаданлагъа, гитчелеге да солууду. Ол къуралгъан жылланы ичинде Кавказда Россейден, тыш къыралладан да кёп къонакъла болгъандыла», - дегенди ол.