Байрамны къыйын болум бузмазча

Жангы жылны аллында МЧС-ни регионда бёлюмюню келечилери  маданият мекямлада бла сатыу-алыу бардырылгъан жерледе от тюшюуге къоркъуусузлукъну жалчытыу не халда болгъанын тинтгендиле.

Эм алгъа ала музыка театрда болгъандыла, анда от тюшгенини юсюнден билдирген системала, кранла, от ёчюлтюучюле тап ишлегенлерин бла къалгъанларын сынагъандыла, мекямдан адамла чыгъарча жерлеге къарагъандыла. Баш управленияны пресс-службасыны башчысы Кантемир Беров билдиргеннге кёре, эсепде беш жюз онюч объект барды, аладан тёрт жюз бла тогъузу адамла аслам жыйылгъан жерледиле, барысында да болум дайым тинтилгенлей турады, къуллукъчула, жууаплы инсанла бла ушакъла бардырылгъандыла, ахырында уа эсгертиуле этилгендиле.

Ызы бла инспекторла пиротехника сатылгъан тюкеннге баргъандыла, анда пиротехника тийишлисича сакъланнганына, аны бла сатыу этерге эркинлик берген битеу къагъытлагъа къарагъандыла. Былайда алыучулагъа да къоркъуусузлукъну жорукъларына уллу кёллю болмазгъа борч салыннганын эсгертилгенди. Юлгюге, фейерверкни чачдырырдан алгъа  аны жорукълада жазылгъаныча тюз жерде орнатыргъа, ол бир жары тепмезча этерге эм къабындыргъандан сора уа отуз метрге бир жанына кетерге тийишлиди, деп ангылатханды инспектор Алан Дзугулов.