Жер-жерли бёлюмге – жигитни аты

Къоркъуусузлукъну жалчытыу федерал службаны чекчи управлениясы кесини жюзжыллыгъын белгилегенди. Байрамны чегинде Огъары Бахсанда бёлюмге Совет Союзну Жигити Матвей Меркуловну аты берилгенди.

Байрам бла байламлы плацда энчи состав бла Тырныауузну мектебини кадетлери жыйылгъандыла. Алгъышлау сёзлерин алагъа чекчи службаны ветеранлары, районну эллерини таматалары айтхандыла. Регионда чекчи управленияны башчысы Игорь Семериков эсгертгенича, Матвей Кузьмич кишилиги, ётгюрлюгю, иш кёллюлюгю, тутхан ишине кертичилиги бла айырмалы болгъанды. Совет Союзну Жигитини алтын майдалы, дагъыда кёп башха къырал саугъасы аны жетишимлерине, аскерчи фахмусуна да шагъатлыкъ этедиле. Огъары Басханда бёлюм да жигитни атын жюрютюрге тийишли болгъанын кёргюзтгенди, дегенди ол.

Управленияны келечиси Алексей Мирошниченко айтханыча,  бёлюмлеге, кемелеге Ата журтну къоруулай жан берген неда чекчи органланы айнытыугъа уллу къыйын салгъан инсанланы атлары бериледиле.  Генерал-лейтенант Меркулов Матвей Кузьмич да чекчи органланы айнытыугъа уллу къошумчулукъ этгенди. «Биз управленияда бёлюмледен бирине аны атын бериуню дурус кёргенбиз. Аны ючюн битеу керекли къагъытла жарашдырылып, чекчи службагъа жиберилгендиле. Коллегия да бу оноуну къабыл кёргенди», - дегенди ол.

Уллу Ата журт урушну ветераны Матвей Меркулов бир минг элли алтынчы – алтмышынчы жыллада къыркъ ючюнчю Къызыл белгили чекчи къауумгъа башчылыкъ этгенди. Эки минг ючюнчю жылгъа дери республикабызда управление бу атны жюрютгенди. Совет Союз чачылгъынчыгъа дери ол Азербайджанда Пришиб шахарда Иран бла чекни сакълагъанды.  Пришибде къыркъ ючюнчю чекчи къауумну токъсанынчы-токъсан ючюнчю жыллада башчысы Пётр Безруков Гюржю бла чекде ишлегенлеринде, ала ол жерли властьла, Къабарты-Малкъарны биринчи президенти Валерий Коков, чекчи районланы башчылары бла байламлыкъла жюрютгенлерин, аланы жанындан къачан да себеплик болгъанын, салыннган борчланы тамамлаугъа жууаплы кёзден къарагъанларын белгилегенди.

Ахырында эсгериу къангагъа гюлле салыннгандыла.