Къан бергенлеге – сый, хурмет да

Республикабызда сыйлы донорланы саны ёсгенди. Къан службада аланы саугъалау болгъанды. Къанларын къыркъдан аслам кере берген адамланы станцияда жылны ахырында саугъалау ахшы тёреге айланнганды. Аланы саулукъ сакълау министрни орунбасары Заурбек Батыров алгъышлагъанды.

- Бек алгъа  сизге саулукъ тилейме. Саусузлагъа хар къан тамычы да багъалыды. Алагъа этген хатеригиз сизге, юйюрюгюзге да уллу игилик бла къайтсын, - дегенди ол.  

«Россейни сыйлы донору» деген ат, саугъала бла башланнган классланы окъуучуларындан ыразылыкъ къагъытла бу кюн онбеш адамгъа берилгендиле. Гитчеле преподаватель Виктория Хажметовада окъуйдула, ол кеси да Федерал медико-биология агентстводан «Донор къымылдауну айнытыугъа этген къошумчулугъу ючюн» майдалгъа тийишли болгъанды. Виктория Хажметова билдиргеннге кёре, ол сабийлеге къанны бериу къаллай уллу магъананы тутханын дайым ангылатханлай турады. Алагъа гитчеликден да адам жанындагъына былай болушургъа боллугъун билдирирге керекди. Окъуучуларым донорлагъа ыразылыкъ къагъытланы экинчи кере жазадыла, ала «Донорну коду. Насийхатчылыкъ» битеуроссей эришиуде да хорлагъандыла, дегенди ол.  

Республикада кёп фатарлы юйлени жангыртыу фондну регионда  операторну келечиси подрядчик Къулийланы Исмайыл да Сыйлы донор деген ат берилгенлени арасындады. «Майдал алгъаным бла бу ишге къатышыууму тохтатырыкъ тюйюлме. Ол угъай, майдал бютюн уллу жууаплылыкъ салады, огъурлулукъгъа андан да бек итиндиреди. Муратыбыз бу жумушха аслам адам къошулурча этергеди, саулукъдан тыйгъыч болмаса, мындан арысында да къан бергенлей турлукъма», - дейди Исмайыл.

Кертиси бла да, донор болуу жангызда огъурлулукъну ышаны тюйюлдю, ол биреуню жашауун  сакъларгъа болушхан амалды. Донорланы хайырындан больницалагъа къан келтириледи, ол а къыйын операцияланы этгенде, айхай да, керек болады. Сыйлы донорланы саугъалау жангызда аланы байрамлары тюйюлдю, ол жамауатха жюрекни огъурлу талпыныууну юсюнден билдирген мадарладанды. Жигит хар бирибиз да болаллыкъбыз, аны ючюн жангыз бир атлам этерге керекди – къан берирге.