Кийик табийгъатха иги кесек къыргъауул жиберилгенди

Кёп болмай "Нальчикни къырал сынау уучулукъ мюлкюнде" Къызыл китапха кирген эм жаланда Шимал Кавказда жашагъан эллиден артыкъ къыргъауулну  кийик табийгъатха жибергендиле.

Анга КъМР-ни Табийгъат байлыкъла эмда экология министрини орунбасары, сакълау, федерал надзор бардырыу, жаныуарланы санын айнытыу эм ала жашагъан жерлени игилендириу жаны бла департаментни таматасы Аслангери Табухов, Май муниципал районну  администрациясыны башчысы Татьяна Саенко, Нальчикни къырал сынау уучулукъ мюлкюню таматасы Мурат Шаов эм башхала къатышхандыла. 

- Быллай акцияны  магъанасы- Къызыл китапха кирген къанатлыны къоруулагъандан сора да,  санын айнытыргъады. Ала республиканы питомнигинде ёсдюрюлгенлерин да энчи белгилерчады. Арт юч жылда  кийик табийгъатха эки мингден артыгъы жиберилгенди, - дегенди Аслангери Табухов.

 Къабарты-Малкъарда не заманда да бу сейир къанатлыгъа уучуланы арасында уллу сурам барды. Ол себепден бир къауум жыл мындан алгъада орнитологла тинтиуле бардыргъанларындан сора, къанатлы  жокъ болуруна къоркъуу сакъланнганын белгилеген эдиле. Алай бла 2017 жылда къыргъауул Къабарты-Малкъарны Къызыл китабына кийирилгенди.