Занкишиланы Казбекни хурметин кёрюп

 «Нальчик» спорт арада аскер самбодан ачыкъ республикалы эришиу бардырылгъанды. Анда Черек районну спортчулары талай майдал алгъандыла. Алай бла, биринчи жерлеге Таукенланы Салим (65 кг), Мусукланы Карим (30 кг) бла Уяналаны Саид (44 кг) чыкъгъандыла. Дадуланы Муслим (57 кг) бла Занкишиланы Ислам (40 кг) – экинчи, Мусукланы Къууанч а (23 кг) ючюнчю жерлени алгъандыла. 

Спортчуланы тренер Жангоразланы Хаким юйретеди. Эришиуню юсюнден айта, ол бу хорламланы бла майдалланы алгъаракълада ауушхан Занкишиланы Казбекге атагъанларын белгилегенди. «Казбекни аты дзюдону, саулай да спортну тарыхында сакъланырыкъды, ол чынтты профессионал, шуёхубуз, къарындашыбыз эди. Бу сабийле да аны юлгюсюнде ёсе, адамлыкъны багъалагъан, ариу ниетли, огъурлу, къарыулу инсанла болсунла. Командабызгъа болушханланы барысына да ыразылыгъымы билдиреме», – дегенди ол.