Солургъа Кавказгъа келгенлени саны кёбейгенди

Быйыл октябрьде бла ноябрьде  къыралны къыбыла эмда Кавказ тийрелерине солургъа келгенлени саны, сентябрь айны кёрюмдюсю бла тенглешдиргенде асламыракъ болгъанды. Анга тау тийреледе туризм кезиу башланнганы да этгенди себеплик, деп билдиргендиле РФ-ни Банкыны Къабарты-Малкъарда бёлюмюнден.

Республиканы Курортла эмда туризм министерствосунда айтханларына кёре, Жангы жыл байрам кюнлеге къонакъ юйледе жерлени 95 проценти толупду. Узакъдан келгенле кёбюсюнде 5-7 кюн солургъа сюйюучюдюле. Алай андан азыракъ заман (2-3 кюн) тургъанланы саны да кёпден-кёп бола барады, ала кёбюсюнде къоншу регионладандыла.

Аш этиу, белгили жумушла тындырыу бла байламлы туризм да айнып барады. Минги тауну этегинде курортда 55-чи къыш кезиу да ачылгъанды. Аны бла байламлы Азау талада ётген той-оюн жыйылыугъа 4,6 мингден артыкъ адам къатышхан эди.

«Туризмде бола баргъан тюрлениуледен сора, Банк хазырлагъан «Регионланы экономикасы» докладда башха бёлюмлеге да энчи эс бурулады. Ол санда эл мюлк, промышленность, жашау журтланы рыногу, предприятияланы ишлери, логистика да бардыла, - дегенди финанс учрежденияны Къабарты-Малкъарда бёлюмюню башчысы Аслан Калов. – Бу докладны хазырлагъанда, предприятиялада соруула бардырадыла, статистиканы тинтедиле, экспертлени оюмларын сурайдыла. Эсигизге салайым, анга онбеш мингден артыкъ предприятие къатышханды, ол санда Къабарты-Малкъардан - 135».

Улбашланы Мурат хазырлагъанды.
Поделиться: