Къолдан усталыкъланы даражаларын ёсдюре

Нальчикде шёндюгюлю АртЭль санатны фестивалы бардырылгъанды. Анда ишлерин Шимал Кавказны регионларындан эллиден аслам инсан кёргюзтгендиле. 

Фестивальгъа къатышханла кеслери тикген кийимлени, накъышланы, турмушда керекли затланы, тюзюнлей да Приэльбрусиядан бет бояуланы келтиргендиле, алай бла тиширыуланы сейирлерин къозгъагъан кёп тюрлю затны кёрюрге боллукъду. Ала ишлеринде асламысында кеслеринде ёсген дарман хансланы – тау дугъуманы, сапыран чапыракъны эм башхаланы хайырланадыла, аланы ийислери ариу болгъанындан сора да, багъыуда кючлери бла белгилидиле, териге да игидиле. 

Фестиваль ючюнчю кере къуралады, анга къатышханланы саны жылдан жылгъа ёсе барады. Къолдан устала аны чегинде бир бирлерини сынамларына юйренедиле, башламчылыкъларын ачыкъ этедиле. Алагъа къараргъа келген адамланы барысы да, уллула, гитчеле да, кеслери жаратхан затланы табаллыкъдыла. Аны башламчысы Жулабланы Мунира айтханыча, башха-башха къолдан усталыкъла бла кюрешгенле мында бириге башлагъандыла, сейир, эндиге дери болмагъан затланы жарашдырадыла. Быллай байрамланы себепликлери бла къолдан усталыкъланы даражасы ёседи, алагъа жамауат аслам эс буруп, багъалап башлайды, дейди ол.   

Анда къолдан усталадан юйренирге да онг берилгенди, ариу жасалгъан жерледе суратлагъа тюшерге, сыйланыргъа да жарагъанды. Алай бла абаданла, гитчеле да заманларын зауукълу ётдюргендиле.