Айырмалылагъа – саугъала

Нальчикде Маданият фондда сабийле ишлеген суратланы «Биз» деген сёзде жюз минг «мен» барма!» деген  IV республикалы конкурсунда айырмалы болгъан жашчыкъла бла къызчыкъла саугъаланнгандыла.

Эки ай мындан алгъа  сабий суратланы конкурсу  къуралгъаныны юсюнден билдирилген эди. Анга республиканы кёп жерлеринден  сабийле къатышхандыла. Ол быйыл бла  тёртюнчю кере бардырылгъанды. Кеси да «Юйюрню жылына» жораланнганды. Анга  Россейни  халкъларыны ассамблеясыны регион бёлюмю, КъМР-ни Миллетлени ишлери эмда жамауат проектле жаны бла министерствосу, Халкъла аралы черкесс ассоциация себеплик этгендиле.

Конкурсда хорлагъанланы алгъышларгъа  МЧА-ны президенти Хаути Сохроков, РФ-ни эмда КъМР-ни Художниклерини союзуну келечиси Ибрагим-Халил Сурхайханов,  «Насыпны чыпчыкълары» организацияны башчысы Наталья Бойко, «СВ-Стиль» жыр студиядан жашчыкъла бла къызчыкъла да келген эдиле.

Ол кюн жыл санларына кёре биринчи, экинчи, ючюнчю сыйлы жерлеге чыкъгъанла  саугъаланнгандыла. Алагъа грамотала,  багъалы саугъала да берилгендиле. Аланы алгъанланы  араларында  Чатталаны Амалия, Бёзюланы Ева,  Алийланы Маржан,  Холамханланы Амалия бла

Джамиля  да болгъандыла. Аланы  «СВ-Стиль» деген жыр студияда юйреннген къызла бла жашла  жарыкъ жырлары, тепсеулери бла алгъышлагъандыла.

Къууанчха Наталья Горностаева, Надежда Булавина да келген эдиле.  Наталья къагъытлагъа «жангы жашау, магъана берирге» юйреннгенди, аладан кёп сейирлик затла ишлейди. Ол «Къолдан устаны къагъытдан этилген заты» деген ат бла  мастер-класс  бардыргъанды. «Къалачны юйюнден» келген  Надежда Булавина уа  къалачланы къалай  бояргъа кереклисине юйретгенди.

Ахырында Маданият фондну таматасы Люаза Макоева  бу ишни бардырыргъа юлюшлерин къошханлагъа - Чувашлыланы «Нарспи» миллет арасыны таматасы Лариса Мизинагъа, «Дагестан» маданият араны келечиси Фатима Хаджиевагъа да  ыспас  этгенди.