Сабийле шёндюгю излемлеге келишген мекямлада окъурча мадарла толтуруладыла

Жууукъ кезиуде баш борчладан бири къыралда школланы тынгылы жангыртыуду, деп белгилегенди Россейни Президенти Владимир Путин «Единая Россия» партияны XXII съездинде.

2031 жылгъа дери къыралда 11 минг мекямны тынгылы тапландырыргъа белгиленеди, деп билдиргенди партияны генсоветини секретары Владимир Якушев. Бу соруу билим бериу учрежденияланы тынгылы жангыртыу эм ишлетиу жаны бла битеуроссей штабда сюзюлгенди. Аны ишине Жарыкъландырыу министерствону эм регионланы келечилери къатышхандыла.

 Владимир Якушев къыралны башчысыны бу буйругъун толтуруу партияны жууукъ кезиуде ишинде баш магъананы тутарыгъын айтханды. «Быйылны аллындан бери тамамланнган ишни юсюнден айтханда, программа хайырлы толтурулады»,-дегенди ол эмда программаны чеклеринде къыралда   1682 сабий сад эм 1439 школ ишлетилгенин билдиргенди.

Быйыл а 98 школну мекямы битдирилип, хайырланыргъа берилгенди. Жылны ахырына дери энтта 134 мекямны къурулушу бошаллыкъды. «Аладан кёплери хазырдыла, жаланда документлени тийишдирирге, лицензияла алыргъа къалгъанды»,-деп къошханды ол.

Партияны оноучусу школланы тынгылы жангыртыу программаны жетишимли бошагъан регионланы юлгюге келтиргенди. Аланы арасында Ингушетия бла Чечен Республика бардыла. Болсада 38 регионда 77 школ битдирилмей къаллыгъына къоркъуу уллуду. 17 регион алгъаракълада бузукълукъла кетерилликлерини юсюнден жууап бергенлерине да къарамай, 31 школну жангыртып бошаялмазлыкъларын билдиргендиле.

Владимир Якушев болумну тюзетир ючюн штабланы къурулушну юсюнде ачаргъа башламчылыкъ этгенди. Ол айтханыча, билим бериу учрежденияланы тынгылы жангыртыу эм ишлетиу жумушла «Единая Россияны» айырыулагъа хазырланнганда эсге алынырыкъды. 

Жарыкъландырыу министр Сергей Кравцов партия бла бирге тамамланнган жумушланы хайырындан программа жетишимли болгъанын белгилегенди. Ол билдирген тарихлеге кёре, 2024 жылны ахырына дери РФ-ни Президенти 1300 школ ишлетирге буйрукъла берген эди. Болсада бюгюнлюкде ала 1400 жетгендиле. 2019 жылдан бери 1682 сабий сад ишлетилгенди, алай бла школгъа дери билим бериу учрежденияла жетер тенгли болгъандыла.

 Ол заманында битдирилмей къалыргъа боллукъ къурулушланы да санагъанды. Аланы арасында Къабарты-Малкъарда эки объект барды. «Жылны ахырына дери аз заман къалгъанды. Объектлени юслеринде ишлерге керекди»,-дегенди министр.

 КъМР-ни Башчысы, партияны регион бёлюмюню секретары Казбек Коков штабны жыйылыууна видео амал бла къошулгъанды. Ол билдиргенича, республикада 66 школ тынгылы жангыртылгъанды.

 - Быйыл   Озрекни, Анзорейни, Кишпекни, Лашкутаны, Нальчикни билим бериу учрежденияларында  бошалгъандыла тапландырыу ишле.   Атажукинода, Къашхатауда, Прохладныйде, Бабугентде, Зарагижде эм Солдатское элде ала андан ары бардырыладыла. Красносельскоеде, Чегемде, Александровскоеде, Нарткъалада эм Прималкинскоеде жангы школла ишлетилгендиле. Шёндю Нальчикде юч мекямда, дагъыда Терекде бла Терс-Къолда къурулуш андан ары бардырылады. Битеу жумушла толтурулсала, сабийлени бир сменнге окъутургъа онг боллукъду. Школла мебель, окъутуу керекле, тийишли оборудование бла жалчытылынадыла. Аны бла бирге устазланы квалификациялары ёсдюрюледи. Мындан ары да сабийлерибиз   шёндюгю заманнга келишген мекямлада окъурча, фахмуларын айнытырча мадарла толтуруллукъдула,-дегенди регионну оноучусу.