Юйюр байлыкъланы сакълай

Маданият жаны бла айнытыу арада юйюр байлыкъланы фестивали бардырылгъанды. Аны чегинде мастер классла кёргюзтюлгендиле, оюнла къуралгъандыла, хорлагъанлагъа саугъала берилгендиле.

Байрамны къурагъанланы мураты – аппалагъа бла аммалагъа, ата-аналагъа, сабийлеге да зауукълукълу, аны бла бирге уа хайырлы да ингир ётдюрюрге эди. Аны башламчысы Азамат Нахушев айтханыча, аланы «Мен Къабарты-Малкъарданма» деген проектлерини борчу бир ненча  тёлюню ала бир бирлерине жашау сынамларыны юсюнден айтырча, бир бирни теренирек ангыларча бирикдириргеди. Ол оюм этгенден, быллай тюбешиуледе ата-аналаны балалары бла байламлыкълары кючленедиле, ала бир бирлерини дуниягъа кёз къарамларына тюшюнедиле. Аны ючюн а абаданла бла психологла ишлейдиле, бусагъатдагъы жаш тёлюню энчиликлерини юсюнден айтадыла, ала бла бир тил къалай табаргъа боллугъун ангылатадыла.

Роботла, илму тинтиуле бла кюреширге сюйген, бизнесге сейирлери болгъан сабийлеге да энчи дерсле берилгендиле. Юлгюге, оюн халда алагъа сатыу-алыуну, ахчаны жюрютюуюню, башламчылыкъларын къалай жарашдырыргъа керек болгъанларын ангылатадыла. Белгили блогерле бла тюбешиуледе уа эм тири сабийлеге саугъала къоллу да болгъандыла.