Аналыкъ капитал – 2507 юйюрге

Россейни Социал фондуну регионда бёлюмю аналыкъ капиталны программасы ишлеп башлагъанлы сертификатланы Къабарты-Малкъардан 93 720 юйюрге бергенди, быйыл а аны 2 507 юйюр алгъандыла.

Сертификат ЗАГС-дан келген къагъытлагъа кёре жарашдырылады эм ананы къырал жумушланы порталында энчи кабинетине жибериледи. Алай бла аны алыр ючюн, фондха барыргъа, къагъытланы жыйышдырыргъа керек тюйюлдю.

2024 жылда биринчи сабий ючюн аны ёлчеми 630,4 минг сом болгъанды, экинчи сабий ючюн а – 202,6 минг сом. Экинчи неда андан сора балала туугъунчугъа дери юйюр аналыкъ капиталны алмагъан эсе, аны ёлчеми 833 мингнге жетерикди. Аны жашау-турмуш болумланы игилендириуге, юч жыллары толмагъан балала ючюн ай сайын тёлеуле алыргъа, сакъатлыкълары болгъан сабийлени социал адаптацияларына хайырланыргъа эм ананы неда атаны боллукъ пенсиясына къояргъа жарайды. Сертификатны бу амалланы бирине неда бир жолгъа талайына жояргъа эркин этиледи, сёз ючюн, жартысын сабийни окъутуугъа, юлгюге репетиторгъа тёлерге, жартысына уа турмуш болумланы игилендирирге боллукъду.

Асламысында капиталны сабийге юч жылы толгъанындан сора хайырланыргъа жарайды. Алай бир-бир болумлада аны бу болжалдан алгъа да бередиле, юлгюге тюз да бала туугъанлай, аны ол кезиуге дери алыннган ипотеканы тёлуге неда ипотеканы биринчи тёлеуюн этерге, сабий садха тёлерге неда ай сайын андан ахча алыргъа боллукъду. Сентябрьден башлаб а капиталны башха амал бла хайырланыргъа да жарайды: андан 10 мингден аз ахча къалгъан эсе, аны бир тёлеу халда алыргъа эм юйюр кеси сюйген жумушлагъа къоратыргъа жарайды.