Эришиуледе сынам жыярча

Универсал сермешден республиканы жыйымдыкъ къаууму къуралгъанды, эм кючлюлени Нальчикде республиканы биринчилигини эм чемпионатыны эсеплерине кёре айыргъандыла.

Спортчулагъа эм алгъа чырмаулары болгъан жолну терк ётюуден сынаула къуралгъандыла. Ызы бла ала илишаннга тюшюуде эришгендиле, сора сермешле башланнгандыла. Чемпионатха къатышханланы араларында жетишимли, спортну устасы деген атха тийишли болгъан гёжефле да болгъандыла. Мында ала усталыкъларын жангыдан кёргюзтюрге керек эдиле, алай бла къараучулагъа эригирге тюшмегенди. Судьялагъа уа жаш спортчуланы  араларында умутландыргъанланы айырыргъа керек болгъанды. Эришиуню баш судьясы Руслан Бетуганов быллай даражада биринчи кере сермешген онеки-онючжыллыкъ спортчуланы усталыкъларына итиниулюклерине,  ёсерге сюйгенлерине да бийик багъа бичгенди. Спортну бу тюрлюсюнден регион федерацияны башчысы Черкесланы Заурбек айтханыча, битеу жыл сан къауумлада да спортчуларыбызны жарауларына, хазырлыкъларына эс бурулады. Энчи магъана аланы жангы тёлюлерин юйретиуге бёлюнеди, нек дегенде жангыз бир къауумну юйретиу бла чекленсенг, аны ызындан келгенле къарыусуз боладыла. Былай ишлеуню хайырындан жетишимлени дайым да сакъларгъа боллукъду, дегенди ол. 

Универсал сермешле республикабызда спортну иги айныгъан тюрлюлериндендиле, спортчуларыбызны жетишимлери, бийик усталыкълары да аны бла байламлыды. Битеуроссей эришиуледен ала хорламсыз хазна къайтмайдыла, дунияны даражада алтынланы алгъанларыбыз да бардыла. Быллай эсепле уллу къыйын салыуну, федерацияла жетишимли ишлегенлери бла байламлыдыла. Бу эришиуде хорлагъанла уа энди кеслерин округда сынарыкъдыла, ала уа, хар замандача, экинчи жылны аллында Нальчикде боллукъдула.