«Сёлешиулени бардырыргъа хазырбыз, излемле окъуна салмагъанлай»

РФ-ни Президенти Владимир Путин тёрели пресс-конференцияда билдиргенине кёре,  Россей Федерация Энчи аскер операцияны Украинада 2022 жылдан эсе алгъа башларгъа керек эди.  Артха къарап айтханда, ол жаны бла оноуну эртте этсем иги боллукъ болур эди, дегенди ол.

 «Аны да биле тургъанлай, иги хазырланыргъа керек эдик,  аллай магъаналы ишни тамамларгъа», - деп чертгенди Владимир Путин. Энчи аскер операцияны артыкъ уллу хазырлыгъыбыз болмай башлагъан эдик, нек дегенде хал осалдан-осалгъа кетип бара эди, ол себепден созаргъа жарамай эди, деп белгилегенди къырал башчыбыз  журналистле бла бардыргъан тюбешиуде.

 «Киевде олтургъан къуллукъчула Минск шахарда къол салгъан келишимлени толтурмазлыкъларыны юсюнден артыкъ уллу букъдурмай айтхан эдиле», - деп чертгенди Владимир Путин. Россейни Президенти белгилегеннге кёре, Москваны Энчи аскер операцияны башларгъа ала кеслери тюртгендиле. Биз болумну алай къайгъылы болгъанын алгъадан ангыласакъ эди, хазырланыу ишлени эртте этерге керегине тюшюнюрюк эдик, дегенди Президент.

Бюгюнлюкде Украина бла сёлешиуню юсюнден айтханда, биз ала бла сёлеширге хазырбыз, алгъадан окъуна излемле салмай алагъа. Сёлешиулени мурдору 2022 жылны аягъында Стамбулда бардырылгъан тюбешиуде этилген келишим болургъа керекди. Дагъыда бюгюнлюкде къаугъала баргъан жерледе болгъан халгъа кёре келиширге керекбиз, дегенди Владимир Путин.

 Аны бла бирге, украинлыла бла   сёлешиуле болуп, анда бир  келишим этилсе, ол жаланда Украинаны Огъаргъы радасы бла эм аны председатели Руслан  Стефанчук бла этилирге керекди, дегенди ол.