Гитче предприятияла иги ишлегендиле

Къырал статистика ведомствону Шимал Кавказда тергеулерине кёре, Къабарты-Малкъарда гитче предприятияла (эм гитчелени санамай) быйыл ал тогъуз айны ичинде кеслерини ишлерине 905,1 миллион сом инвестицияла этгендиле. Былтырны ол кезиую бла тенглешдиргенде,  ёсюм 40 процентге жетгенди. Бу жаны бла эл мюлк, жарашдырыучу эмда къурулуш биригиуле башхаладан эсе тирирек болгъандыла, сагъынылгъан кёрюмдюню 80 процентин да ма ала жалчытхандыла, дегендиле республикада «Мени бизнесим» арада.

Саулай айтханда, бюгюнлюкде бизни республикада 326 гитче предприятие ишлейди, аладан 64 проценти оптовый эмда розница сатыу-алыуда къармашадыла. Улоулагъа бла мотоцикллеге ремонт этиу бла бешден бири кюрешеди, къалгъанлары уа ма бу сфералада ишлейдиле: жарашдырыучу производствола (14,7%), къурулуш (13,5%), эл мюлк (9,5%).

Быллай предприятияланы барында да бюгюнлюкде 7,9 минг адам урунады. Алагъа тёленнген орта айлыкъ хакъ 33,3 минг сомду, кеси да арт жылда 27 процент къошханды.

Быйыл ал тогъуз айны ичинде бу предприятиялада ахчаны жюрютюу 38 процентге ёсюп, 44,6 миллиард сомгъа жетгенди. Ол санда 62 проценти кеслери чыгъаргъан товарла эмда жалчытхан жумушла бла байламлыды. Товарланы юсюнден айтханда, аны тёртден биринден къалгъанын эл мюлк эмда жарашдырыучу, къурулуш эмда сатыу-алыу организацияла чыгъаргъандыла.

Улбашланы Мурат хазырлагъанды.
Поделиться: