Ахшы онгла берликди

Арт кезиуде жаш тёлю окъугъан мектеплеринден тышында бардырылгъан регион, къырал даражалы дерс олимпиадалагъа къатыша, алада болдургъан жетишимлерини себепликлери бла къыралыбызны къалайында да белгили университетге кирир ючюн аланы эсеплерин да хайырланадыла. Алгъадан чертсек, «Россети» компанияланы къауумларыны битеуроссей олимпиадасы да аллай даражадады. 

Башхача айтханда уа, окъуу юйлени профильли ызларына кире туруп, олимпиадада эсеплери сабийни Бир къырал сынаулада алгъан балларына къошуладыла. Андан сора да, окъуу юйге целевой къагъыт бла кирирге, анда билим алгъандан сора уа, «Россети» энергетикалы компанияладан биринде ишге тохташыргъа да онг барды. 

Интеллектуал эришиуде кеслерини билимлерин тогъузунчу-онбиринчи класслагъа жюрюгенле сынап кёрюрге боллукъдула. Андан сора да, аллай эришиулеге колледжлени бла лицейлени окъуучулары къошулургъа эркиндиле. 

Бу олимпиада Россейни Жарыкъландырыу министерствосуну оноууна тийишлиликде жыл сайын да къуралып, интеллектуал конкурсланы тизмесине киреди. Быйыл а ол (9-чу, 10-чу, 11-чи класслагъа) юч кезиуге юлешинип бардырыллыкъды. Биринчи уруму  физикадан, математикадан эмда информатикадан ишле жангы жылда февральда боллукъду. 

Экинчи бёлюмюнде уа сабийлени чыгъармачылыкъ хунерлерине эмда билимлерин практикада къалай хайырланалгъанларына къараллыкъды. Башхача айтханда уа, жыйымдыкъ ишле кейследе берилликдиле. Бу кезиую февральда башланып мартда да озарыкъды.

Ахыр урумуна уа биринчи эмда экинчи кезиулени эсеплерине тийишлиликде айырмалы болгъанла къатышырыкъдыла. Ол а конференция халда бардырыллыкъды. 

Олимпиадалада жетишимлилеге, айтханыбызча, Бир къырал экзаменлерине балла къошулгъанларындан сора да, ала аны хар урумунда белгиленирикдиле эмда Москвагъа саугъаларын къууанчлы халда алыргъа байрамгъа чакъырыллыкъдыла. Аны бла бирге уа, корпорацияны проектли сменаларына къатышыргъа онг да табарыкъдыла. Ала уа «Орлёнок» Битеуроссей сабий арада бла МГУ-ну Михаил Ломоносов атлы университетли гимназиясыны мурдорунда бардырыллыкъдыла. Сейир проектлени билдириулени эмда аланы жашауда къалай бардырыргъа боллугъуну юслеринден а сынамлы насийхатчыла сёлеширикдиле. 

Олимпиадагъа къатышып, анда кеслерини хунерлерин, билимлерин ачыкъларгъа излегенле эмда аллай ахшы онгла бла хайырланыргъа сюйгенле уа заявкаларын биринчи февральгъа дери берирге тийишлидиле.