Чыгъармачылыкъ ара ишин бардырады

Басханны сабий чыгъармачылыкъ арасында отуз эки биригиу барды, алагъа минг бла сегиз жюз сабий жюрюйдюле.

Жаш модельерле тигиу машинала бла таукел хайырланадыла, ала шёндюгюлю жыйрыкъланы, миллет чепкенлени да кеслери бичедиле. Юлгюге, Мелисса бусагъатда гинжисине жыйрыкъчыны тигип бошай турады, ызы бла уа абадан адамлагъа кийимле  тигиуге  кёчерикди. Аны мураты ‒ белгили дизайнер-модельер болургъа, адамлагъа ариу кийимле тигергеди.

Сабийлени бирси къаууму уа минчакъладан накъышла саладыла, бусагъатда ала аналарына саугъала хазырлай турадыла. Бу иш инсандан тёзюмлю, низамлы болурун излейди, къызчыкъла анга юйреннгендиле, бек башы уа ‒ керти да ариу затла жарашдырадыла.

Бирлери накъышланы тюрлю-тюрлю амалла бла хазырларгъа юйренедиле, башхалары бери суратла ариу ишлегенлери ючюн, фахмуларын бу жаны бла да кёрюр мурат бла келгендиле.

Шахматла бёлюмде оюнла керти эришиуледеча барадыла. Анатомия дерследе сабийле инсанны чархын тинтедиле, программированияда Интернетде ишлеуню жашырынлыкъларына тюшюнедиле, технологияла дуния бла шагъырейленедиле. Юйретиу дагъыда кёп жаны бла бардырылады, аланы хар сабий да хунерине кёре сайлайды.

Араны башчысы Алёна Зеушева белгилегенича, ала окъуучулагъа фахмуларын ачыкъларгъа эм айнытыргъа болушурча не къадар ахшы онгла къураргъа кюрешедиле. Ата-анала бла бла да байламлыкъла жюрютюледиле, сабийле уа жетишимлери бла къууандырып башлагъандыла.