Ышаннгылы амалланы сюзгендиле

Къабарты-Малкъар къырал университетни медицина академиясыны бла «Кардиопрогресс» фондну башламчылыкълары бла Кавказны кардиологларыны бла терапевтлерини оналтынчы илму-билим бериу конференциялары болгъанды. Анда жюреклери ауругъанланы реабилитациялауну, аурууну тохташдырыуда, багъыуда эмда аны профилактикасын бардырыуда жангы технологияланы, ышаннгылы амалланы хайырланыуну юслеринден сёлешгендиле.

Онлайн халда бардырылгъан конференциягъа Россейни битеу да федерал округларындан эмда Азербайджандан бла Тюркден экспертле бла клиникалы врачла къатышхандыла. Аланы лекцияларына уа терапевтледен бла кардиологладан сора да, саулукъ сакълау бёлюмню бирси специалистлери тынгылагъандыла.

Пленар жыйылыуну чеклеринде жюрек-къан тамырла аурууланы хирургияны амаллары бла багъыуну; ёпкеледе юсден кетмеген аурууланы; аш орун-чеги жаны бла сакъатлыкъны; ич секрецияны безлерини аурууларыны  саны ёсе баргъаныны; терапевтлени ишлеринде тюбеген психосаматикалы эмда неврологиялы ышанланы бла юлгюлени юслеринден да сёз баргъанды.

Юлгюге, КъМКъУ-ну факультет терапия кафедрасыны башчысы, медицина илмуланы доктору Мурат Уметов жюрек-къан тамырла ауруула нени хатасындан къозгъалыргъа эмда айныргъа боллугъуну юсюнден айтханды. Ол аурууну къозгъаргъа эмда айнытыргъа боллукъ къоркъууланы юлгюлерини юслеринден тынгылы билдириу этип, Шимал-Кавказ федерал округну регионларында жашагъанлагъа бу жаны бла къаллай къоркъуу барлыгъын баямларыкъ энчи рискометрлени (тестлени) жарашдырыу да кесини себеплигин берир эди деген оюмун билдиргенди. Андан тышында да, профессор жюрек-къан тамырла ауруула бла байламлы профилактикалы амалланы жашауда бардырыуну эсеплерин да белгилегенди.

Конференцияны иши бир бёлек тематикалы симпозиумну чеклеринде къуралгъанды. Алада уа «Жюрек-къан тамырла ауруула бла байламлы къоркъууну баямлау», «Къыйын диагноз. Ол клиникада тюбеген бир къауум юлгюню келтириу», «Ич ауруула», «Къан басымны кётюрюлюую», «Жукъгъан ауруула» дегенча эмда башха темаланы юслеринден лекцияла болгъандыла. Аланы уа барысын да «Кардиопрогресс» фондну официал сайтында табаргъа, окъургъа эмда хайырланыргъа боллукъду.