«Бу дунияда хар адамгъа ариулукъ, насып тилейме»

Озгъан ёмюрледе бетлерин, сыфатларын тюрлендиргенле мингледен бирле эдиле. Бусагъатда уа хар экинчи адам ботокс уколла этдиреди, кёпле пластика  хирургияны жетишимлери бла хайырланып, бурунларын, къулакъларын, кёзлерин – къашларын да тюрлендиредиле. Аз да къартая башлансала уа, артыкъ терилерин скальпель кеседи. Ёмюрлюк ариулукъгъа итиниу шёндюча къаты бир заманда да сезилмегенди. Локияланы  Жаннет бусагъатда бизни республикада  белгили врач – косметологладан бириди. Ол Нальчикде «Наоми»  салонну тутады. Баш иеси Черкесланы Алибекди, ала  къыз бла жаш ёсдюредиле.

- Жаннет, юйюр жашау бла ишни келишдирген къыйын тюйюлмюдю?

- Ишинги сюе эсенг – угъай! Алиханчыкъгъа ай толгъанлай, мен ишге чыкъгъанма. Шукур Аллахха, бек тап жашайбыз, мен ахча излеп къайтмагъанма былай терк салонума. Билемисиз, врач -  косметолог  чыгъармачылыкъ иш бла кюрешеди. Мен да  хар адамгъа аны энчи сыфатын табаргъа болушама. Суратчы кибик!  Кюн сайын «сау болугъуз, сизге насып, узакъ ёмюр тилейме» дегенни эшитип турсанг, ишинги андан да бек игилендирирге итинесе. Мен бир фирма бла да келишимле этмейме. Нек? Бир фирмада бир крем игиди, башхасында уа – башха. Келишимле этсем, кесими онгларымы байлап къоярыкъма, иги – аман болса да продукциялары, бир фирмаладан алыргъа тюшерикди.

- Ишлерге, салгъан муратларыгъызгъа жетерге къалай юйреннгенсиз?                  

-  Бизни республикада жашагъанла солургъа бек сюедиле…артыкъ бек ишлеп къыйналмасала да.   Солуу неди? Ишден келип, юйде жумушланы этсем – солуйма. Юйден салонума барып, кёлюмю салып урунсам – юй ишден солуйма!  Сабийлигим бек насыплы эди, ол заманлагъа кёре, бек иги жашай эдик.

Алай атам Локияланы Рашит бизни сагъат тёртде – бешде уятып, дачагъа элтиучю эди – ишлерге.  Дачада ёсген битеу затланы да ол базарда, тюкенледе сатып алаллыкъ эди, алай биз къара ишни эбине тюшюнсек сюе эди. Сау болсун ол дерсле ючюн.   Салон ачханымда, маникюр – педикюр этген уста, чач къыркъыучу, сора кесим косметолог болуп ишлеп башлагъан эдик. Биринчи кезиуледе, аягъы юсюме тургъунчу, полланы кесим жуугъанма. Мен аны ючюн уялгъан угъай, ёхтемленнген этеме.  Салиманы да алай юйретебиз. Ол гитче Алиханчыкъгъа къарайды, юйде не жумушну да этеди.

- Сюймеклик аталаны – аналаны кёзлерин жумады бирде. Сабийлерини терс болгъан кезиулерин эслемейдиле.  

- Сёзсюз, хар ата – ана да сабийлерин сюедиле. Алай ол сюймеклик аланы кёзлерин жапмазгъа керекди. Сабий игини – аманны ангыламайды,  юйретирге керекди. Аны себепли мен къатыракъ болургъа кюрешеме, менден эсе аталары жумушагъыракъды, бир – бирде сабийлеге хорлатады…аскерчи  адам болгъанына да къарамай. Алибек – Черкесланы Георгий Маштаевични туудугъуду, мен къайын атам Романнга да сый – хурмет этеме. Бусагъатда къатымда адамланы асламысы Черкесладандыла.

Дуния – кезиудю. Жюзжыллыкъ ёмюр – бир такъыйкъады. Игилик этерге ашыгъыргъа керекди. Ахчалары болмай, алай ариу болургъа итиннген тиширыулагъа къолумдан келгенича болушама. Мени ёсдюргенле манга салгъан къыйынлары зыраф болмагъанын кёрселе сюеме. Ниетим  тазады, бу дунияда хар адамгъа насып тилейме. Бусагъатда къыйынлыкъ кётюргенлеге уа – тёзюм. Аланы ачыулары барыбызны жюреклерибизге  тийгенди, ачытханды.

- Жангы затны этип башлар ючюн, баям, кесинге ийнаныргъа керек болур?…           

-Не ишде да биринчи атлам этген бек къыйынды. Алай хар инсан да кесине ийнаныргъа, жарыкъ умутуна барыргъа борчлуду. Жангы затны башларгъа къоркъургъа керекмейди.

 Батырла, ётгюрле, иш кёллюле къурулушланы башлайдыла, фабрикала, заводла ачадыла, школлада, больницалада жетишимли урунадыла. Къоркъгъан жюрек сокъурду, аллында болгъан амалланы окъуна кёрлюк тюйюлдю. Битеу манга ийнаннган адамлагъа жюрек ыразылыгъымы билдиреме.