Республика жангы миллет проектлеге къатышыргъа хазырды

Алгъаракъда Москвада вице-премьер Татьяна Голикова башчылыгъында ётген «Къыралда саулукъ сакълау: бюгюн эмда тамбла» семинарны эсеплерине кёре, Къабарты-Малкъар да инсанланы жашауларын иги, ёмюрлерин  узакъ этиу башламчылыкълагъа къатышыргъа хазырды, деп айтылады КъМР-ни  Правительствосуну сайтында.

Келир жыл «Узакъ  ёмюрлю эмда тири жашау», «Саулукъну сакълагъан жангы амалла», «Юйюр» деген жангы миллет проектле башланырыкъдыла. Ол себепден регионда жашагъан инсанланы жашауларын иги эмда узакъ этиу жаны бла бек къаты ишлерге керек боллукъду. «Саулукъ хар кимге да» къырал проект бла Басхан эмда Элбрус районланы ара больницаларында тамата тёлюге саулукъ арала къураллыкъдыла. Медицина учрежденияланы мюлк-техника жаны бла онгларын кючлендириуге тийишлисича эс бурулуп турлукъду, аланы ишлери андан ары игилендириле барлыкъды.

Дагъыда къыркъ объект ишленирикди, отуз бла алтысы жангыртыллыкъды, тёрт район больница энтта да мекямла къошулуп кенгертилликдиле, 132 санитар улоу, 21 мобиль  комплекс, 297 оборудование сатып алынырыкъдыла, жети поликлиникагъа энтта да аллай затла берилликдиле.

Сабийлени, ёсе келген тёлюню эмда тиширыуланы саулукъларына, сора сабийле асламыракъ болуруна энчи эс буруллукъду. Ол хыйсап бла энчи бёлюмлени саны кёбейтилликди, ала кеслери да хар кереклери бла жалчытылынырыкъдыла.

Медицина реабилитация тири айнып барлыкъды, умутлада – аллай оналты амбулаторный бёлюм бла тёрт стационар ачаргъады. Дагъыда саусузланы алгъан юч модуль эмда терк медицина болушлукъ берген талай бёлюмле ачыллыкъдыла.

«Саулукъ сакълау» миллет проектни хайырындан республика бюгюнлюкде иги жетишимле болдура барады: хайырланыугъа иги кесек объект бериледи, медицина учрежденияланы мекямлары жангыртыладыла, шёндюгю оборудование сатып алынады.