Эл мюлк продукцияны чыгъарыу ёсгенди

Быйыл тогъуз  айгъа чыгъарылгъан эсеплеге  кёре Къабарты-Малкъарда эл мюлк продукцияны  производствосу  104,1 процентге ёсгенди. Алай республика Шимал-Кавказ федерал округда алчы болгъанды.  Аны бизге Кавказстатны пресс-службасындан билдиргендиле.

Бютюнда уллу ёсюм малчылыкъ бёлюмде эсленеди. Былтыр бу заман бла тенглешдиргенде,  этден 6,2 процентге кёп сатылгъанды.  Жумуртхаладан – 3,7 эм сютден 2,2 процент ёсюм эсленеди.  Ол СКФО-да эм уллу жетишимледен бириди.

Сёз ючюн, къыйма продукцияны юсюнден айтханда,   507 тоннадан аслам   чыгъарылгъанды. Ол,  былтыр бу заман бла тенглешдиргенде,   4,4  процентге кёпдю.

Бюгюнлюкде республикада къыйма продукция этген беш уллу предприятие барды. Ала тууарны  бла юй къантлыланы этинден алты тюрлю къыйма чыгъарадыла.  
Эсге сала айтсакъ, сагъынылгъан кезиуде   тууарны бла юй къанатлыланы этинден 85,7 минг тонна сатылгъанды. Ол, былтыр бу заман бла тенглешдиргенде 6,2 процентге кёпдю. Андан  37 процент, неда 32 минг тонна,  предприятиялагъа жетеди. Мында да 104,8 процент ёсюм эсленеди.