Тарыхны кертичилиги сакъланырча

Къабарты-Малкъарны къырал университетни Медицина факультетинде жангы жылгъы парламент тюбешиуле болгъандыла. Депутатла бла тарыхчыла Уллу Ата журт урушну  эмда Совет Союзну гитлерчи Гкпманияны ууатханына салгъан юлюшюню  юсюнден сёлешгендиле.

Жыйылыу Уллу Хорламны 80-жыллыгъына аталып къуралгъанды. Анга «Россейли тарых биригиуню» республикада бёлюмюню бла Гуманитар тинтиулени Къабарты-Малкъар институтуну келечилери да къатышхандыла. Ала тыш къыралланы бир къаууму  экинчи дуния урушну тарыхын чубур айландыргъанларын, ол башланнганы ючюн  Совет Союзну терслегенлерин да айтып,  жалгъан шартланы кертиге бурургъа кюрешгенлеге къажау кюреш бардырыргъа чакъыргъандыла.  

Тарыхчы Артур Кажаров эсгертгенича, къанлы урушда къыралыбызгъа уллу заран тюшгенде, алай халкъларыбыз ол сынауну ёхтем кётюргендиле. «Токъсанынчы жыллада да жалгъан тарых шартла берирге кюрешгенле чыкъгъандыла, жангы тинтиуле башланнгандыла.  Европада тарыхны тюрлендирирге талай кере кюрешгендиле. Эм алгъа, ала сталинчи бла гитлерчи низамланы тенг этгендиле, анга кёре уа резолюцияны да къабыл кёргендиле»,-дегенди ол.

Жыйылгъанла тарыхны терс жазгъанланы тыйыуну, тёрели тин-ниет хазнабызны мурдоргъа салыуну дурус кёргендиле.  Ата журтха сюймеклик юйюрде башланады, ол сезим бир тёлюден башхасына ётдюрюлюрге тийишлиди деп, ол оюмда келишгендиле.