Ёсюм кёргюзтгенле асламдыла

Бизни къыралда тиширыу предпринимательство арт кезиуледе аз-аздан ёсюм кёргюзтюп барады. Ахыр жыллада энчи предприниматель эмда кеслери иш къурап къармашхан тиширыуланы саны селеймейди, ол ала бизнесде алгъан жерни магъанасын кёргюзтеди. Ала жумушла бериуню кёп тюрлюлери бла кюрешедиле, сатыу-алыуну бардырадыла, юс кийимле тигедиле, туризмни айнытадыла.

Бюгюнлюкде Россейде 4,2 миллион энчи предприниматель барды, ол санда 1,75 миллиону  тиширыуладыла. Аны юсюнден МСП Корпорацияны тинтиулери хапарлайдыла. Кеслери иш къурап къармашханланы арасында уа аланы саны къайда кёпдю – 4,96 миллион. Ол аллай инсанланы ичинде 44,5 процентни тутады.

- Быйыл энчи предпринимательлени санына 317 минг тиширыу къошулгъанды. Аланы ма бу бёлюмлеге сейирлери барды: урунуу эмда ишчиле излеу (+32%), къурулуш (+30%), информациялы технологияла (+29%). Дагъыда юс кийимле тигиуде, билим бериуде, туризмде, бухгалтерияда, ветеринарияда, страхованияда, косметологияда къармашыргъа сюедиле. Автослесарьланы, сантехниклени, бытовой техникагъа ремонт этиучюлени ичинде уа ала бек аздыла. Аланы бизнеслерини орта жыл саны беш жыл бла тогъуз айды, кишиледе уа – алты жыл бла юч ай. Тиширыула бир жылгъа ишлеген ахчаны орта ёлчеми 5,3 миллион сомду, кишиледе уа – 7,3 миллион сом, - дегенди сагъынылгъан Корпорацияны башчысы Александр Исаевич.

Ол дагъыда бир шартны чертгенди: къыралдан болушлукъну кишиледен эсе тиширыула кёбюрек аладыла. Нек дегенде  ала бу амалны юсюнден кеслери да иги биледиле, башхаланы да шагъырейлендиредиле. Аны хайырын кёрген киши предпринимательлени саны уа 7-10 процентге азды.

Къабарты-Малкъарда бюгюнлюкде 16 минг энчи предприниматель ишлейди, аладан 6,1 минги  тиширыуладыла, дегендиле республиканы Экономиканы айнытыу министерствосунда. Кеслери иш къурап къармашханланы юсюнден айтханда уа, тиширыуланы саны 42,1 минг болады (53,4%).