Ипотеканы алгъанла азайгъандыла

Бизни республикада адамла алгъан кредитлени барын да тергегенде, быйыл 1 октябрьге ол кёп къалмай 104 миллиард сом болгъанды. Бу кёрюмдю бир жылны ичинде онжети процент къошханды, деп билдиргендиле РФ-ни Банкыны Къабарты-Малкъарда бёлюмюнден.

Сёз мында кредитлени эки тюрлюсюню юсюнден барады: ипотеканы эмда абери сатып алыргъа берилген ахчаны. Биринчиси бу кезиуде 13 процент къошуп, 45,5 миллиард сомгъа жетгенди, экинчиси уа андан да асламыракъ болгъанды – 58,4 миллиард сом (+21%).

Быйыл октябрьге дери адамлагъа 62 миллиард сом берилгенди кредитле бла. Озгъан жылны ол кезиую бла тенглешдиргенде, ол да 20,5 процентге кёп болгъанды. Ёсюмню асламысын абери сатып алыргъа берилген кредитле жалчытхандыла. Аланы (53 миллиард сом битеу да) 43 процентге кёп алгъандыла.

Ипотеканы бериу а иги да азайгъанды (-38,6%). Ол алай болгъанын Банкда льгота программа тохтагъанындан эмда къыралны болушлугъу бла бардырылгъан программала тюрленнгенлеринден кёредиле. Дагъыда ипотека багъаракъ болгъанын эсге саладыла.

Банкла уллуракъ процентле тёлегенлери себепли, адамла алада счётлагъа кёбюрек ахча саладыла. Быйыл октябрьни аллында вкладла 60,6 миллиард сомгъа жетгендиле. Ол а былтыргъы кёрюмдюден бешден бирине аслам болгъанды.