Жолла мардалагъа келиширча

РФ-ни Правительствосуну Председателини орунбасары  Марат Хуснуллин айтханнга кёре, "Къоркъуусуз эм тынгылы автомобиль жолла" миллет проектге кёре быйыл 1,4 минг километр чакълы регион  магъаналы жоллагъа  тынгылы ремон этилгенди. Жылны ахырына энтта да 3,5 минг километрге къараллыкъды.

 Ол билдиргенича, ала   транспорт аслам жюрюген эм къыралны экономикасын айнытыуда уллу  магъаналары болгъан трассаладыла.  Ол санда административ араланы  муниципал районла бла байлагъан, уллу промышленный  предприятияла бла   кластерлеге  баргъан эм башха ызлагъа  къошулгъанладыла.

Бюгюнлюкде къыралда  регион магъаналы жолланы 70,67 проценти мардалагъа келиширча этилгендиле. Ол планда  белгиленнген кёрюмдюден кёбюрекди.

- РФ-ни Президентини буйругъуна тийишлиликде  2030 жылгъа сагъынылгъан кёрюмдюню  85 процентге жетдирирге борчлубуз.  Ол себепден ишле тийишли халда барырча уллу жууаплылыкъ изленеди.  Анга кёре транспорт инфраструктура айнырча, жоллада бир тюрлю чырмау чыкъмазча  биринчиден  тынгылы план жарашдырыргъа керекди, - деп къошханды  Федерал жол агентствону таматасы  Роман Новиков.
Эсге сала айтсакъ, быйыл "Къоркъуусуз эм тынгылы автомобиль жолла" миллет проект ишин бошайды.  Аны себепли энди жоллагъа «Жашау этерге инфраструктура» деген миллет проектге кёре къараллыкъды.  

Къабарты-Малкъарны юсюнден айтханда, къоншу регионлагъа,  Лескен, Урван, Терк эм Май районлагъа  баргъанла да тири хайырланнган, аслам транспорт жюрюген  Аргудан – Александровская жол графикде  белгиленнгенден бир жылгъа  алгъа  хайырланыргъа берилгенди.  Аны узунлугъу 16 километрге жетеди.

- Ишлени кезиуюнде машинала чырмаусуз жюрюрча  трассаны экиден тёрт ызгъа дери кенгертгендиле. Къоркъуусузлукъ жалчытылынырча да мадар этилгенди, ол санда ортасы бла темир буруу тартылгъанды.
Андан сора да,  Терк районда къаты бла темир жол баргъан  эки километр чакълы бирде  трассагъа тынгылы ремонт этилгенди.  

Жылны ахырына Къабарты-Малкъарда регион магъаналы жолла - 81 проценти - жангы излемлеге келиширча  боллукъдула. Ол шарт 2030  жылгъа бу категориялы  жолланы 85 процентге игилендирирге эм аны бла  Президент салгъан борчну толтурургъа онг берликди.