Жолла сыйдам бола барадыла, умутла энтта да кёпдюле

«Къоркъуусузлу тап жолла» миллет проектни хайырындан Къабарты-Малкъарда ахыр жыллада кёп иш этилгенди, деп билдиргендиле республиканы Транспорт эмда жол мюлк министерствосуну пресс-службасындан.

Бу проект бардырылып башланнганлы алты жыл болады. Ол кезиуде республикада жол инфраструктураны игилендириу жаны бла аслам мадар этилгенди. Анга шагъатха шартла: 1118 километр жолла жангыртылгъандыла, 375 километр узунлукъда чыракъла орнатылгъандыла. Жаланда былтыр 150 километр жоллагъа ремонт этилгенди, аны экиден биринде уа энди кече да жарыкъ боллукъду.

Андан сора да, туризм объектлеге элтген эмда РФ-ни Мурдорлу тизмесине кирген жолла, шахарны ичинде бир ненча уллу эмда гитче орамла жангыртылгъандыла. Социал магъаналы объектлеге, школлагъа, сабий садлагъа, больницалагъа баргъан жоллагъа бютюнда уллу эс бурулгъанды.

Келир жылда иш андан ары бардырыллыкъды. Тийишли тизмеге кёп жол эмда участкала тюшгендиле, ол санда: Биринчи Лескенни бла Хызны башыны арасында 3,1-  километрлик, Дейское бла Терекское эллени арасында 4,1- километрлик, Малканы бла Ингушлу тийрени арасында 8,1 - километрлик кесеклери эм башхала.