Кюзлюк сарымсахны заманы

Кёпле сарымсакъны урлугъун жерге шёндюден окъуна салып къоядыла. Ол къышны иги чыдайды, жаз башында кюн не аз да жылынып тебирегенлей,  ёсюп башлайды. Россельхозараны Къабарты-Малкъарда бёлюмюнден билдиргенлерича, тирлиги бай болур ючюн, сарымсах  салыуда, башха не тюрлю битимледеча, кесини жорукълары бардыла  аланы сансыз этерге керекмейди.

Эм биринчиден жерин сайларгъа керекди. Сарымсах  ачы болмагъан, битимли, жумушакъ топуракъны сюеди. Игиси – ол къара неда бираз сарыракъ болса. Дагъыда жорукъ: урлукъну кюн иги тийген жерледе салыгъыз.

Алай аны къайтарып бир участкада салып турургъа керекмейди. Бир болмаса да, эки жылгъа бир кере уа алышыргъа керекди. Алайда уа  ары дери нашала, бадыражанла, къудору, баклажанла ёсген эселе иги боллукъду. Сарымсахны наныкъ тизгинлени ортасында салыргъа да жарайды - аны ийиси заранлы къурт-къумурсхаланы юркютеди.

Урлукъну салгъынчы, жерни бир ай алгъа къазып хазырларгъа керекди. Ызлагъа семиртгичледен салса  ол да иги хайыр келтирликди. Аланы фосфор-калий тюрлюлерин жаяргъа тийишлиди. Сюйсегиз а аны орунуна кюл неда тартылгъан доломит таш чачыгъыз.

Сарымсах ны урлугъун иги айырыгъыз, жукку, жаралы болгъанларын кетеригиз, къалгъанларын а, аурууладан сакъларча, марганцовка сууда жарым сагъат чакълы тутугъуз.

Урлукъну жер бузлап башлагъынчы эм азындан эки ыйыкъ алгъа салыргъа керекди. Кюндюз а хауа 7-8 градусдан жылы болмасын. Теренлиги 5-10, тизгинлени ортасы уа   10 сантиметр болургъа керекди. Ызы бла суу салыгъыз, андан сора уа башына салам неда агъач къышхыр жайыгъыз. Аны барын да этсе, келир жылда сарымсакъ иги тирлик бла къууандырлыкъды.