Окъуучуларын ариулукъну дуниясына жууукълашдырыргъа итине

Алийланы Рауханият технологиядан бла сурат ишлеуден устаз болуп Быллымны орта школунда эрттеден бери ишлейди. Жыйырма беш жылны ичинде ол бийик усталыгъы, фахмусу ючюн да кёп кере махтау алгъанды эмда саугъаланнганды. Ол санда  Билим бериу эмда илму  министерствону, профсоюзланы обкомуну, Элбрус районну билим бериу управлениясыны, Окъуучуланы илму-техника жаны бла айнытхан республикалы араны  саугъаларына да тийишли болгъанды.

"Ана тилим - жаным, тиним" деген республикалы эришиуню "Халкъымы усталыгъы" деген бёлюмюнде биринчи жерге чыкъгъанды. 2012 жылда "Жылны устазы" деген конкурсну район кезиуюнде  хорлагъанды.

-«Жылны устазы» деген эришиуде мени ишлериме бийик багъа бергенлери мени бек къууандыргъанды. Жангы жетишимлеге кёллендиргенди. Андан сора уа «Ёсе келген жаш тёлюню эстетика жаны бла билимлерин айнытыуда сурат ишлеу искусствону магъанасы» деген темагъа устазланы август кенгешлеринде докладчы болгъан эдим. Кёп тюрлю семинарлагъа къатышып, кенгешледе сёлеширге тюшгенди. Районну устазларыны предмет комиссиясыны келечиси болуп да  бир ауукъ жылдан бери ишлейме. Ачыкъ дерсле бериуню уа артыгъыракъда жаратама,- дейди устаз.

Ол сурат ишлерге сабийлигинден сюйгенди.  5-чи классда окъугъанында,  анасы Нальчикни чыгъармачылыкъ арасыны сурат ишлеу кружогуна береди. Анда ол белгили суратчы Андрей Лукич Ткаченкодан дерсле алып, сайлагъан сейирине сюймеклигин кючлегенди.Ол кезиуде окъуна жаш суратчыны ишлерин кёп эришиулеге ашыргъан эдиле. Аладан бири  суратчыланы Венгрияда бардырылгъан халкъла аралы эришиулери болгъанды.

Фахмулу адам  хар жаны бла да аллайды, деп бошдан айтмагъандыла эрттегилиле. Рауханият школну алтын майдалгъа бошап, Къарачай-Черкес Республиканы Къырал педагогика институтуну сурат ишлеу эм графика бёлюмюне киргенди. Аны бошагъандан сора, сурат ишлеуден, черчениядан эм труддан устаз болгъанды. Студент жылларында да суратлары Къарачайда, Ставрополь шахарда да кёрмючлеге салыннгандыла.

Эм аллындан, устаз болмаса да, спортчу болур муратлы эди. Спортну оюнла тюрлюсюнден регион даражада жетишимле болдургъанды.

Окъуудан сора аны Быллым элге ишлерге жибередиле. Ахыр курсда окъуй туруп, быллымчы жаш Алийланы Солтан бла юйюр къурагъаны себепли, буюрулгъан элине арсарсыз келеди. Школну  устазлары анга жарыкъ тюбеп, ишини башлауунда болушуп, билеклик этгендиле. Алай бла   5-8-чи классланы  сабийлерин окъутуп башлайды. Сурат ишлеуюн да тохтатмайды. Табийгъатны ариулугъу аны кёзлеринде бла жюрегинде жангы сыфатла туудура эдиле. Энчи адамларын суратларын ишлерге да сюеди жаш суратчы. Курсундан кёплени суратларын ишлеп къууандыргъанды. Артдан-артха уа графика бла къол усталыкъгъа кёчгенди. Неге узалса да, аны ариу, тынгылы этала эди.

Кеси билген усталыкъгъа сабийлени юйретирге да сюйгенди.   Роза Хамзатовнаны (школчула атына къысха алай айтадыла)  окъуучулары технологиядан бардырылгъан район олимпиадалада хар заманда алчы жерлени алгъандыла. Диана Кагаованы, Ахматланы Мадинаны, Ёзденланы Бэлланы, Афашокъаланы Фатиманы, Ахматланы Джаннетни, дагъыда кёплени ишлери районда бардырылгъан эришиуледе кёп кере хорлагъандыла.

Рауханият Хамзатовнаны къызы Джамиля да анасыны ызын сайлагъанды. КъМКъУ-ну  бошап, бусагъатда Тырныауузну 1-чи номерли лицейинде сурат ишлеуден устазлыкъ этеди.

Роза Хамзатовнаны  окъуучуларыны къол ишлери районну кёрмючлерин кёп кере жасагъандыла. «Тёгерегибизде дуния», «Жаш тёлю наркотиклеге къажау», «Айырыула  сабийлени кёзлери бла», «Минги тауну жулдузу», «Бу Хорламны кюню» деген эришиуледе махтаугъа тийишли суратла болгъандыла.

Бусагъатда да школда чыгъармачылыкъ иш къыстау барады. Окъуучула «Алтын кюз арты», «Жаз башыны макъамлары», «Сакъ болугъуз - от», «Саулукълу жашауну сайлайбыз» деген белгили эришиулеге къатышадыла. Кеси школларында актовый залны къол ишлери бла сюйюп жасайдыла. Сау окъуу жылны ичинде толтургъан ишлерин жылны ахырында отчёт кёрмючде къурайдыла. «Уста къолла» деген кружокну окъуучулары ол ишлени кёбюсюн кеслери алларына  жарашдыргъандыла.

Хунерли устаз ишлеген жылларыны ичинде кёп методика жаны бла болушлукъчу китапла жыйгъанды. Аланы араларында схемала бла суратла, накъышла салып тигиуден, ыргъакъ бла эшиуден, минчакъланы бла инжилени хайырланыудан, оригами хазырлаудан да юйретиу пособияла бардыла. Дерслеринде ол бу амалланы барысын да кенг хайырланады. Миллет энчилигибизни чертген къол ишле хазырлауда уа адетлерибизни бла тёрелерибизни магъаналарын ангылата, аланы сакъларгъа кереклисине да тюшюндюреди.

Игиликге, аламатлыкъгъа итиниуню чеги жокъду, деген сёз барды. Мени бюгюннгю жигитим да окъуучуланы чыгъармачылыкъгъа бла искусствогъа жууукълашдырыр ючюн, кёп амалланы хайырланады.

Устаз жаланда юйюнде, юйюрюнде насыплы болса, ишине жюреги бла берилгени да тюз болур. Рауханият Хамзатовна жашау нёгери  Солтан бла ариу юйюр къурап, эки жаш бла бир къыз ёсдюргендиле. Ала саулай юйюрлери бла жашауларын школда ишлеуге жоралагъандыла. Юйюр таматасы Солтан Тырныауузну 1-чи номерли лицейинде физкультурадан устаз болуп, кёп жылланы ишлейди. Башда сагъыннганыбызча, Джамиля ол лицейде сурат ишлеуден юйретеди. Абадан жашлары Марат да ол лицейни программистиди. Гитче жашлары Мурат а Быллымда анасы ишлеген школда программистди.

Юйюрде эм магъаналы байлыкъгъа сабийлеге сюймекликни, бир бири араларында жууашлыкъны бла огъурлу байламлыкъны санайдыла. «Юлгюлю» деп быллай юйюрлеге айта болурла.