Сакъ болууну амалларын сюзгендиле

КъМКъУ-да «Интернетде террорист къауумланы иннетлери: ала бла къажау кюреш бардырыуну амаллары» деген темагъа семинар бардырылгъанды. 

Анга КъМР-де МВД-ны Экстремизмге къажау иш бардыргъан арасыны оперуполномоченныйи В.А., «Ата журтну къоруулаучула» фондну регион бёлюмюню башчысыны орунбасары Чеченланы Эльдар эм КъМР-ни Жаш тёлю правительствосуну председатели Байтуугъанланы Исмайыл къатышхандыла.

Тюбешиуню кезиуюнде ала студентлеге жаш тёлюге къоркъуулу болгъан шёндюгюлю информацияла къаллайла болгъанларыны юсюнден айтхандыла. Ол затладан кери бола билиуню амалларына да энчи эс бёлюннгенди.

Экстремизмге бла терроризмге къажау тура билиу окъуу юйлени къоркъуусузлукъларын жалчытыуда баш магъананы тутады. Студентле тюрлю-тюрлю экстремист къауумланы келечилерини «жомакъларына» тынч ийнанып къаладыла. Ала уа ол жаш адамланы кеслерине тартыргъа ёчдюле. Аны себепли тюбешиуле бардырып, алагъа ишни болушунлай ангылатыу керекди.

Бу ишни КъМР-де МВД-ны Экстремизмге къажау иш бардыргъан арасыны оперуполномоченныйи В.А., КъМР-ни Жаш тёлю правительствосу эм Х.М.Бербеков атлы  КъМКъУ къурагъандыла.