Жангы оборудование чыгъарып башларыкъдыла

 Май районда Россейде рентген оборудование этген белгили  «Севкаврентген — Д» завод узакъдан ишлетирге жарагъан управлениясы бла   „Парус“  рентген-аппаратны  чыгъарып башларыкъды. Ол  женгил эм ишлерге да тап устройстводу.  Аны бла  травматология, ортопедия, хирургия жаны бла саусузлагъа къараргъа жарарыкъды. 

- Ол стационарлагъа, жерлеринден кёчюрюрге жарагъан пунктлагъа салыргъа  эм машинаны мурдорунда жюрютюрге жараулу устройстводу. Аны бла  бир жолгъа танг кесек адамгъа къараргъа  жарайды, - дейди заводну   сервис  службасыны таматасы  Владислав Занозин.

Специалистле айтханнга кёре,  аппаратны узакъдан ишлетирге жарагъаны саусузгъа бютюн  тынгылы къараргъа онг береди. Андан сора да, пандемияны кезиуюнде, ол врачны саулугъуна заран жетмезча  ахшы себеплик этерикди.

Бюгюнлюкде предприятияда  рентгенодиагностика  комплексле, цифралы флюорографла дегенча  эки жыйырмагъа жууукъ медицина  оборудование чыгъарылады. Болсада «Парус» аланы борчларыны танг кесегин кеси жангыз толтурурчады. Проектни бардыргъан жалгъан акъылны болушлугъу бла   клиника тинтиуле да этилгендиле. Аны кезиуюнде ол кесин сынамлы аппаратча кёргюзтгенди.

Биринчи заманда  аппаратны къурамына тийилмей, ол  сынау халда ишлерикди. Ызы бла   дистанция управление жаланда алыучуну ыразылыгъы бла салынырыкъды.