Хычиннге жетген болмагъанды

Кёп болмай Кавказ.РФ. биригиу къурап  Минги тауну тийресинде  Азау майданда быйыл  экинчи кере «Элбрусну татыуу» деген аш-азыкъ, маданият фестиваль болгъанды. Анга жыйырмадан артыкъ биригиу къатышханды. Къараргъа келгенлени саны уа  жети мингден атлагъады. 

Ала тюрлю-тюрлю миллет ашарыкъланы, татыуларын кёрюрге, аланы хазырларгъа  окъуна  онг тапхандыла. Болсада хар тёртюнчю  хычиннге бюсюрегенлерин билдиргендиле.   

Жырлаучуланы, тепсеучюлени номерлеринден къуралгъан  жарыкъ концерт программа къонакъланы кёллерине жетгенди.  Бу жол сахнагъа жетмишден аслам музыкант чыкъгъандыла. Ол санда «Ритмика»,  «Горец»,  «Рябушки», Nota Bene эм башхала. Андан сора да, майданда  Шимал-Кавказны къол усталарыны  чыгъармачылыкъларындан кёрмюч  къуралгъанды. Хар замандача, сейирге къалдыргъан ишле кёп эдиле.  

Хар кюнден хычинден башлап шишлике дери  эллиден артыкъ азыкъ этилгенди. Туристле бегирек  шишликни, пловну, локъумланы эм хачапурилени жаратхандыла. 

Ол кюн сыйлы къонакъланы санында  таулагъа  ёрлеучю Алина Пекова да болгъанды. Жыйылгъанланы асламыча, ол да хычин, локъум  бла сыйланнганды.  

Сынамлы поварла уа юч кюнню ичинде  отуздан артыкъ  мастер-класс бардыргъандыла. Миллет азыкъла бла шагъырейлендирирча сабийлеге да  энчи программа  къуралгъанды.  Кёбюсюнде алагъа къалачла эм башха татлы затла этерге юйретгендиле.

- Фестиваль лыжалада учхан кезиуюню аллында баргъаны энчи  магъаналыды. Мында спортну эм татымлы азыкъланы сюйгенле жыйыладыла. Быллай акцияла адамланы бирикдирирге болушадыла.   Тюбешиуню солугъанладан тышында, Элбрусдан, Нальчикден эм къоншу  регионладан    рестораторла да ашыгъып сакълайдыла. Нек дегенде мында кёп жангы азыкъны кёрюрге онг барды. Сёз ючюн, къозу этден башлап   макаронс, тирамису пирожналагъа дери.   Жыйылгъанланы хауа болумну кюйсюзлюгю окъуна  жунчуталмагъанды. Ол шарт башламчылыгъыбызны уллу магъаналылыгъын кёргюзтеди,- дейди  Кавказ.РФ биригиуню таматасыны орунбасары  Рустам Тапаев.