Окъуучуларыны эслеринде сакъланнганлай турады

Адамланы эслеринде сакъланнган къадар, дуниясын алышхан сауду, деген сёзле бошдан айтылмайдыла. Саулай жашауун сабийлеге жоралап, элли жылны устаз болуп кесин окъуучулагъа сюйдюрген инсанланы намыслары, сыйлары да ёмюрледе сакъланнганлай турадыла. Аллай хурметли устазладан бири Алтууланы Аубекирни къызы Цаколаны Фатимады.

 Аны усталыгъыны, адамлыгъыны юсюнден да ариу сёзлени аз эшитмегенме. Окъуучулары уа анга ыразылыкъны газетибизни бетлеринде да басмаласакъ сюйгендиле. Фатима Аубекировна Къазахстанда туугъан тёлюден болгъанды. Сабий заманында юйюрю бла туугъан жерлерине, Ташлы-Талагъа, кёчедиле. Школда аламат окъугъан, сабийлигинден да билим бериуню сюйген инсан, устазлыкъны сайлайды. 1969 жылда КъМКъУ-ну педагогика колледжини башланнган классланы устазы  бёлюмюн бошайды.

Юйленнгенинден сора уа,  жашау жолу аны Огъары Малкъаргъа элтеди. 1970 жылны биринчи сентябринден башлап Малкъарны биринчи номерли орта школунда ишин тири башлайды. Кёп жылланы ичинде хар сабийни да, ёз балаларынча, таза жюреги бла сюйюп, окъургъа, жазаргъа юйретгенден сора да, жашауда тюз жолну тутаргъа, адамлыкъгъа, намысха сакъ болургъа юйретген насийхат сёзлери хар окъуучусуну да эслеринде турадыла. Устазларына ыспас сёзлерин айтыргъа сюйген окъуучулары аз болмагъандыла, аны ариу сёзлери, игиликге итиндиргени да жашау жолларында тюз жолну сайларгъа болушханын да чертгендиле.

Москвада Россейни «ИТАР-ТАСС» билдириу агентствосуну социал эм гуманитар билдириу редакциясыны корреспонденти Герийланы Асият да биринчи устазын былай эсгереди: «Хар окъуучусун да ариу жазаргъа, окъургъа юйретгенинден сора да,  хар бирибизге да аналыкъ эте билгенди. Ол Огъары Малкъарны кёп тёлюсюн, сабийлерин юйретгенди, къарындашым Абузейит бла эгечим Ариужанны да ол окъутханды. Жылла озгъанлыкъгъа,  бир окъуучусун да унутмагъанды, хар сабийни да андан ары жашаулары къалай болгъанын соргъанлай, жарсый билген адам эди. Ман а аны бютюнда энчи сюйгенме, ол манга устаз болгъанындан сора да, эмчек анам да болгъанды. Фатима Аубекировнаны классына тюшер ючюн а,  бир жылны артха берген эдиле школгъа. Сабий адамны таза жюрегин ангылагъан этеди деп да бошдан айтылмайды, биз хар бирибиз да аны энчи сюймеклигин ангылагъан эте эдик. Аны игилигин айтып бошарча сёзле да табалмазла деригим келеди. Ол устазлыкъны чынтты юлгюсю болгъанды».

- Керти адам, терен билимли, хар сабийге да бирча къарагъан, къарыуун, жашауун, саулугъун, заманын да аямагъан устаз болгъанды. Школубузда ишин билмеген, сабийлени сюймеген устазла болмагъандыла. Хар бири да энчидиле, алай Фатима Аубекировна ол школну бир энчи хазнасы эди. Сабийлени айырмагъанлай, хар бирин да энчи сюйгенди, ишин да аламат билгенди. Ол кёп ишлеген эсе да, ауругъан эсе да, хар дерсин да сабийлени сейирлерин къозгъарча бардыргъанын энчи чертирчады,- дегенди Огъары Малкъарны биринчи номерли школуну сабий садыны юйретиучюсю Алтууланы Аминат.

 Устазына жылы сёзлерин РФ-ни юстиция министерствосуну КъМР-де управлениясыны таматасы Къужонланы Жантемир да айтханды: «Хар сабийни да жашауунда биринчи устазы уллу жерни алады. Ол керти да сабийлени сюйген инсан эди. Керти устаз бла уа сабийни андан ары билим жолу жарыкъ, женгил да болады деригим келеди. Фатима Аубекировна керти да аллай огъурлу устаз эди, анга тюшер ючюн, башха школдан кёчген эдим. Ол манга берген билим, насийхат сёзле не заманда да эсимдедиле. Аллай устазны таныргъа, аны окъуучусу болургъа да амалым болгъанына бек ыразыма. Сабийлерими да аллай устазлары болса сюеме. Фатима Аубекировнача  педагогла тёлюден-тёлюге чынтты юлгю болуп айтылгъанлай, адамланы жюреклеринде жашагъанлай турадыла».

- Фатима Аубекировна эм сюйген адамларымдан бири эди. Огъурлу, халал, кесин сюйдюрген, ишине тасха тюшюрмеген. Аны къолундан кёп сабий ётгенди. Огъары Малкъарны сабийлерине салгъан халал къыйыны бизни барыбызгъа да жарагъанды, ол дуниясына да жарасын деп тилейме,- дегенди Нальчикни экинчи шахар поликлиникасында ишлеген Эндрейланы Асият.

Ол огъурлу устаз болгъанындан сора да, жууукъларыны, биргесине уруннганланы ичинде да намысы жюрюген адам эди. Огъурлу устаз баш иеси Исхакъ бла тёрт сабий ёсдюргендиле, ала да-ариу къылыкълыла, намыслыла, билимлиле. Жашы Аслан,  анасыны жолу бла барып, устазлыкъны сайлагъанды.

 Даражалы, огъурлу  устазны Цаколаны Фатиманы аты Огъары Малкъарда, ол къыйын салгъан школда да унутуллукъ тюйюлдю, аны ызы уа устазлыкъгъа кертичиликни жарыкъ юлгюсюдю.