Ипотекада тургъан фатарны сатаргъа жарайды

Фатарны ипотекагъа сатып алгъан адам  анда сау ёмюрюн жашаргъа борчлу тюйюлдю:  бирде анга эркинирек неда гитчерек жашау журт керек болуп да къалады. Алай эсе уа, ипотекада тургъан фатарны сатаргъа боллукъмуду? Анга «Роскадастрны» Къабарты-Малкъарда бёлюмюнде жууап бергендиле.

Ипотека кредитге алыннган фатар, багъасы толусунлай тёленип бошалгъынчы, инсанны угъай, банкны иелигинде турады. Башхача айтханда, ол - залог мюлкдю. Адам а анга бир тюрлю оноу этерча эм биринчиден банкдан эркинлик алыргъа керекди. Анда уа анга угъай дерге да боллукъдула («Ипотеканы юсюнден» законнга тийишлиликде).

Жеринден тепдирилмеген мюлк, ол санда фатар да, залогда тура эсе, аны юсюнден информация тийишли реестрде (ЕГРН-де) жазылады. Аны этип, кредит организация, ипотеканы алгъан инсан тёлеялмай къаллыгъындан кесин сакълайды. Адам борчун толусунлай берип бошагъандан сора, ЕГРН-ден ол чеклениу да кетериледи.

Быйыл сентябрьде «Ипотеканы юсюнден» законнга кийирилген тюрлениулеге тийишлиликде, банкда залогда тургъан фатарны сатаргъа женгилирек онгла бериледиле. Алагъа кёре энди аны кредитни толусунлай тёлеп бошамай окъуна сатаргъа жарайды.

«Ипотекагъа фатар алгъан инсан  аны сатаргъа сюе эсе, банкга билдирирге керекди. Заявлениясын почта бла жиберирге, сюйсе уа жерине элтип берирге боллукъду», - дегенди «Роскадастрны» Къабарты-Малкъарда бёлюмюню башчысы Анна Тонконог.

Банк ызы бла он кюнню ичинде заявлениягъа къарайды, угъай дерге сылтау болмаса, аны дурус кёреди. Аны этгенден сора,  фатарны (андан азгъа сатаргъа жарамагъан) эм учуз багъасын тохташдырады.

Алай бла залогда тургъан фатарны банк заявленияны алгъан кюнден башлап тёрт айны ичинде сатаргъа эркинлик бериледи. Бу заманны ичинде мюлкню сатып, башхагъа иеликге (Росреестрде) кёчюрюп, банкга кредитни да тёлеп бошаргъа керекди. Аны болжалын созарча эки жаны да оноулашыргъа керекдиле.

«Дагъыда айтырыгъым: эки жаны да келишселе, банк ол фатарны сатаргъа болушургъа боллукъду. Аны бла байламлы къоранчларын а тёлерге тюшерикди, нек дегенде ала ипотекагъа кирмейдиле, аны бла жабылмайдыла», - дегенди Анна Тонконог.

Алай бла залогда (ипотекада) тургъан фатар сатылгъанлай, аны ахчасы банк белгилеген счётха тюшеди. Ол уллуракъ багъагъа сатылгъан эсе, финанс учреждение аны инсаннга къайтарады, къошакъ къоранчларын да (ала бар эселе) чыгъарып.

Мюлк адамны иелигинде беш неда андан аз жыл тургъан эсе, ол аны сатхан багъасындан налог тёлерге борчлуду. Аны ёлчеми 13 процентди. Ипотекагъа алыннган фатар да ары киреди.