Жашау журтну саугъагъа берирге сюе эсегиз

Тийишли законодательствода айтылгъаныча, мюлкню иеси аны къалай сюйсе да хайырланыргъа эркинди. Ол законнга къажау иш болмасын ансы, сюйсе аны сатаргъа, биреуню атына кёчюрюрге, саугъагъа берирге, абериге алышындырыргъа да боллукъду. Аланы къайсысы этилсе да, жеринден тепдирилмеген мюлкню Бирикген къырал реестринде (ЕГРН) аны юсюнден белги салынады.

Саугъагъа бергенде

Законда айтылгъаныча, мюлкню саугъагъа бериу деп, аны башха адамны атына хакъ алмай кёчюрюуге дейдиле. Быллай саугъалау – келишимди. Келишимде уа эки жаны болады: берген эм алгъан.

Фатарны неда юйню саугъагъа берликме деп аууздан айтып къойгъанлыкъгъа, аны бир тюрлю (законлу) кючю жокъду. Право жаны бла да мадар этиллик тюйюлдю. Сёз ючюн, юйню ачхычларын неда къагъытларын биреуге бергенликге, документде кимни аты жазылып эсе да, мюлк аны иелигинде къалады. Алай эки жаны да келишим этип, анга  къол салсала,   ызы бла регистрация этиучю ведомствода жангы иеликни эсепге салсала, юй андан сора бирси адамгъа кёчеди.

РФ-ни Налог Кодексини 217 статьясыны 18.1 кесегинде айтылгъаннга кёре, келишим этгенле бир юйюрню адамлары неда жууукъла эселе, быллай саугъа этилгени ючюн налог тёлерик тюйюлдюле. Фатар тыш адамны къолуна кёчсе уа, ол аны кадастр багъасындан 13 процентин тёлерге керекди.

Саугъагъа хазыр мюлкню угъай, юлюшлю къурулушдан бир кесегин да берирге боллукъду.

Бу магъаналыды! Мюлкню саугъагъа берген адамны бирси адамдан абери излерге эркинлиги жокъду. Башхача айтханда, анга андан бир тюрлю файда тюшмезге керекди. Келишимде ол абери излегенини юсюнден жазылса уа, ол жалгъан келишимге саналлыкъды.

Бериу, алыу жумушла

Саугъалау къалай этилиучюсюню юсюнден РФ-ни Граждан кодексини 32-чи бёлюмюнде айтылады. Мюлкню башхагъа жаланда аны иеси берирге эркинди. Ол келишимге къол салып, алай къырал регистрация этилгинчи ауушса, мюлк башханы иелигине кёчюрюлмей къалады.

Акъылбалыкъ болмагъан эмда кеси жумушларына къараялмагъан инсанланы закон бла белгиленнген келечилеринде, аланы иелигинде болгъан мюлкге быллай оноу этерге эркинликлери жокъду. Медицина, билим бериу, социал жумушла жалчытыу организациялада кечиннген гражданлагъа эмда аланы жууукъларына, мюлклерин аллай организацияланы келечилерине саугъагъа берирге жарамайды, закон бла анга чек салынады. Къырал эмда муниципал къуллукълада уруннганланы, Россейни Банкыны ишчилерин да быллай мюлк бла саугъаларгъа жарамайды. Коммерциялы организацияла да бир бирлерини арасында аллай келишим эталлыкъ тюйюлдюле.

Къаллай къагъытла изленирикдиле?

Саугъагъа берилген мюлкге ие болуруна шагъатлыкъ этген документге сагъынылгъан келишим саналады. Анда биреу аны хакъсыз берирге сюйгенин, башхасы уа – алыргъа угъай демегенин билдиредиле.

Бу келишимни нотариусда къабыл этерге кереклиси жокъду. Алай иш доверенность бла этиле эсе, кеси да мюлкню бир юлюшюню юсю бла, анга тюбемей боллукъ тюйюлдю.

Келишим нотариусха барып этиле эсе, мюлкню регистрациясыны документлерин да аны болушлугъу бла жарашдырыргъа боллукъду. Нотариус а, мычымай, ол кюн окъуна (неда келишимде белгиленнген замандан кеч къалмай) тийишли ведомствогъа документлени электрон халда жиберирге керекди. Анда уа бу къагъытланы излерикдиле:

1. мюлкге иеликге эркинликни регистрациясыны юсюнден заявление;
2. келишимге къол салгъанланы документлери;
3. келишимге биреу ючюн башха адам къол саллыкъ эсе, биринчи инсандан (нотариус къабыл этген) доверенность;
4. саугъагъа бериуню юсюнден келишим;
5. къырал пошлина тёленнгенини юсюнден квитанция.

Мюлкню къырал регистрациясын этерча заявленияны МФЦ-гъа неда Кадастр палатаны бёлюмюне барып берирге, сюйсегиз а, Росреестрни сайтына кирип жиберирге боллукъду.